د نړۍ ۲۰۰ هېوادونه د اقلیم بدلون د تړون پلې کولو باندې هوکړه وکړه.
د اقلیم بدلون دغه هوکړه د نړۍ لویو اقتصادونو په ګډون امریکا هم لاسلیک کړې چې له ۲۰۲۰ کال وروسته به پلې شي.
د غونډې ګډونوالو هوکړه کړې چې تر ۲۰۳۰ م کال پورې به د دای اکساید ګاز کچه ۵۵ سلنه راکمه کړي.
د نړۍ شاوخوا ۲۰۰ هېوادونو استازي د پولند کټوېس ښار کې راټول شوي او له دوو اونیو خبرو او بحثونو وروسته د پاریس د ۲۰۱۵ م کال د اقلیم بدلون د پلې کولو په تړاو هوکړې ته رسېدلي دي.
د دغې غونډې مشر د هوکړې پلې کېدو ته تمه ښودلې او ویلي یې دي چې نړۍ دغې هوکړې ته اړتیا درلوده.
کلیپ، میکایل کورتیکا، د اقلیم د بدلون غونډې مشر، (( څرنګه چې مې د پنجشنبې په شپه وویل، دغه هوکړه په ډېر نازک وضعیت کې ده، موږ ټول اړ یو چې د رسېدلو لپاره هڅې وکړو، موږ ټول مجبور یو چې راتلونکې ته وګورو او د انسانیت لپاره یو قدم مخ پر وړاندې کېږدو))
امریکا چې ګواښ یې کړی و د پاریس د اقلیم بدلون له هوکړې به ووځي، د اقلیم بدلون دغه هوکړه یې لاسلیک کړې ده.
ملګرو ملتونو هم د اقلیم بدلون هوکړه هیله بښوونکې وبلله.
کلیپ، پاترېشیا اسپنسیا، د اقلیم بدلون لپاره د ملګرو ملتونو ځانګړې استازې، (( له دغې هوکړې سره سم زه باور لرم چې ټول غړي ژمن دي چې د اقلیم بدلون په تړاو خپلې هڅې ګړندی کړي، دا زموږ دنده ده چې نورې هوکړې هم وکړو او زه په ټولو باور لرم چې په ګډه به وتوانېږو د اقلیم بدلون سره مبارزه وکړو))
د دغې هوکړې له مخې به غړي هېوادونو هڅه کوي چې اقلیم بدلوونکې ګازونو تولید را کم کړي چې د ځمکې له لا ګرمښت څخه مخنیوی وکړي.
