د افغانستان د میډیوټیک موسسې په نوښت د څلورو هېوادونو ځوانانو سیمهييز کنفرانس جوړ شو.
افغانستان لپاره د ایران سفیر محمد رضا بهرامي د کنايې په ژبه وویل، نړیوال دې د سیمې هېوادونو د ګواښلو لپاره د افغانستان خاوره نه کاروي.
د میډیوټیک موسسې په نوښت جوړ شوي کنفرانس کې د افغانستان پر سوله ییز حل خبرې وشوې او د زور له لارې یې د ستونزې حل ناشونی وباله.
د افغانستان د ميډیو ټیک موسسې په نوښت د افغانستان، پاکستان، ایران او تاجکستان د ځوانانو سفیرانو سیمهیز کانفرانس جوړ شوی و.
په دغه کانفرانس کې د افغانستان لپاره د ایران استازی وايي؛ د افغانستان سوله نظامي حل لاره نه لري. هغه زیاته کړه سوله د منطقې غوښتنه ده او نړیوال دې دغه خاوره د سیاسي رقابتونو ډګر نه ګرځوي.
د ایران استازی وايي؛ په افغانستان کې ښکیل هېوادونه دې له داسې تحرکاتو لاس واخلي چې د منطقې هېوادونه پرې ګواښل کيږي.
د ځوانانو سفیرانو استازي روان سیاسي وضعیت ته په کتو د سیمې هېوادونو د دایمي سولې او ښو اړیکو رغولو لپاره د منطقې هېوادونو د ځوانانو تر منځ د افکارو بدلون اړین بولي.
دوی وايي؛ د سولې لپاره خپلو هڅو ته دوام ورکوي او په راتلونکي کې په ګاونډیو هېوادونو کې د ځوانانو سفیرانو کانفرانسو د جوړولو خبره کوي.
د افغانستان د سولې عالي شورا د سولې لپاره د منطقې هيوادونو د ځوانانو تر منځ ناستې ستايي او د دوام غوښتنه یې کوي.
د سولې عالي شورا وايي؛ د افغانستان د سولې په تړاو هر ډول ناستو نه هر کلی کوي او د همکاري ډاډ ورکوي.
په دغه کانفرانس کې د افغانستان، تاجکستان ایران او پاکستان د ځوانانو سفیرانو په ګډون افغانستان لپاره د سیمې هېوادونو ځینو سفیرانو دولتي چارواکو او د مدني ټولنو استازو ګډون کړی چې د دوو ورځو لپاره دوام لري.
