پکتیکاوال: که حکومت په شپنیو عملیاتو کې د ملکي وګړو ژوند ته پام ونه کړي پر وړاندې به یې را پورته شي.
د پکتیکا د ګومل خلک وايي، که د شپنیو عملیاتو په مهال د ملکي تلفاتو مخنیوی ونشي، د حکومت خلاف به ملي پاڅون وکړي.
د ګومل لسګونه خلک چې له دوو ورځو راهیسي ښرنه کې په لاریون بوخت دي وايي، د تېرې شنبې او یکشنبې په ورځ یې د شپنیو عملیاتو پرمهال، یوولسو ملکي وګړو ته مرګ ژوبله اوښتې ده.
د پکتیکا ولایتي چارواکي تازه په دې اړه له خبرو کولو ډډه کوي، خو تر دې وړاندې يې ویلي وو، چې شپني عملیات له کابله پلانېږي.
معترضین وايي، د یادو عملیاتو پرمهال شپږ ملکي وګړي وژل شوي، او د ښځو او ماشومانو په ګډون پنځه ټپیان دي، او درې بې ګنا کسان یې له ځان سره وړي دي.
د دوی په وینا چې په عملیاتو کې مالي زیانونه هم ور اوښتي دي.
دوی غوښتنه کوي چې د ګومل پېښه دې د یوه باصلاحیته پلاوي له لورې وڅېړل شي او راتلونکو عملیاتو کې دې د خلکو ژوند ته پام وشي.
په شپنیو عملیاتو کې ملکیانو ته د مرګ ژوبلې د اوښتو په اړه د پکتیکا ولایتي چارواکي خبرو ته حاضر نه شول، خو تر دې وړاندي ولایت مقام ویلي وو، چې شپني عملیات له پلازمېنې کابله پلانېږي.
یوناما د جمعې په ورځ په خپرې شوې اعلامیه کې د ملکي مرګ ژوبلې په لوړوالي اندېښنه ښودلې وه او د جګړې له ښکېلو خواوو یې غوښتنه دا وه چې په عملیاتو کې دې د ملکیانو ژوند ته پام وشي.
