د ملي امنیت عمومي رییس د نامسووله وسله والو مشر علیپور د ملي حاکمیت پر نقض تورن کړ.
د ملي امنیت عمومي رییس معصوم ستانکزي مشرانو جرګه کې وویل چې علیپور په یو شمېر ویډیوګانو کې د ځانګړې جغرافیې او بیرغ غږ پورته کړی چې د ملي حاکمیت نقض دی.
ستانکزي پر هغو چارواکو نیوکه وکړه چې د نامسووله وسله والو مشر علیپور یې د هېواد زړور بچی بللی او د هغه په خلاصولو کې یې هڅه کړې ده.
ستانکزي وویل چې علیپور په ضمانت خوشې شوی او بېرته به عدلي او قضايي ارګانونو ته معرفي شي.
د ملي امنیت عمومي رییس ډاډ ورکړ چې افغان ځواکونه د هېواد په هره برخه کې دښمن نیولای شي او دغه وړتیا لري.
د ملي امنیت رییس زیاته کړه چې لسګونو هغو کسانو ته یې هم جلبونه لېږلي چې له قانون څخه په سرغړونو تورن دي او باید د ځواب ویلو لپاره دې عدلي او قضايي ارګانونو ته حاضر شي.
