ټرمپ؛ مکسیکويي کډوال دې د محکمې پرېکړې ته په تمه شي.
د امریکا ولسمشر ډنالډ ټرمپ وایي، څو چې د امریکا محکمه د دې کډوالو قضیې ارزوي، دوی باید مکسیکو کې پاتې شي.
اخوا د تکزاس ایالت پر پوله زرګونه نور پوځیان میشت شوي، چې د امریکا متحده ایالتونو ته د مرکزي امریکا کډوالو ور تلونکي کاروان مخه ونیسي.
د مکسیکو له لارې د امریکا متحده ایالاتو ته له مرکزي امریکا څخه د زرګونه کډوالو ور تلونکی کاروان نږدی شوی.
د امریکا ولسمشر ډنالډ ټرمپ په خپله ټوېټر پاڼه ليکلي، چې دا کاروان باید تر هغې په مکسیکو کې په تمه شي، ترڅو د امریکا محکمه د دوی قضیو په تړاو ارزونه کوي. د مکسیکو کډوالو چارواکي بیا وايي، له امریکايي چارواکو سره یې د کډوالو په اړه خبرې کړي دي.
د مکسیکو کډوالو کمېسیون مشرې جولېټا وېنسېس داسې ویلي (( د بهرنیو چارو وزارت چارواکو د امریکايي چارواکو سره خبرې کړي، که چېرې امریکا کډوالو ته لاره پرانېزي، نو دوی به د غوښتنې په اړه موږ ته یوه بیانیه را کوي، چې په غوښتنه کې شرایط څه دي او که دا د دوی په ګټه نه وي نو دوی به دلته راګرځي.))
اخوا د امریکا په تکزاس ایالت کې د پولې پر سر شاوخوا شپږ زره اضافي پوځیان ځای پر ځای شوي، چې د کډوالو مخه ونیسي.
د امریکا د پوځ عامه چارو افسر ډېرېک وامسلي داسې ویلي (( دا خنډونه د دې لپاره دلته اېښوول شوي، تر څو هغه کډوال چې غواړي له غیر قانوني لارې امریکا ته دننه شي، مخه یې ونیول شي.))
که څه هم د کډوالو کاروان له پولې څخه زرګونه کېلو متره لرې دی او ځایي خلک د پوځ دا چمتو والی حماقت بولي.
اخوا دملگرو ملتونو د کډوالو عالي کمشنر د ولسمشر ټرمپ پراداره بیا نیوکه کړې، چې د ملگرو ملتونو د کډوالو عالي کمشنري له ټولو هېوادونو نه غوښتنه کوي، چې که څوک د پناه غوښتلو درخواست کوي او بشري مرستو ته اړ وي نو پکار ده، چی دواړه ورته پرته له ځنډ برابر کړي.
