د ډیورنډ فرضي کرښې پورې غاړې پښتانه سیاستوال د پښتون پولیس په وژنه کې د پاکستان حکومت مسوول بولي.
د کرښې پورې غاړي پښتنو د ننګرهار له چارواکو او خلکو مننه وکړه چې د طاهر داوړ جسد ته یې درناوی وکړ.
د کرښې پورې غاړې ولسونو پاکستان ته خبرداری ورکړ چې دوی به هېڅکله لر او بر افغان ولسونه سره جلا نه کړي.
د ننګرهار په دور بابا ولسوالۍ کې د پښتون پولیس طاهر داوړ د جسد تر پیدا کېدو وروسته قومي مشرانو او چارواکو د هغه جنازه وکړه او په تورخم کې یې د پاکستانیو چارواکو پر ځای د ډیورنډ کرښې پورې غاړې پښتنو ته وسپاره.
له کرښې هاخوا پرتو ولسونو د طاهر داوړ د جسد پر وړاندې د ننګرهار د مخورو او خلکو له ښه چلند مننه کړې او ویلي یې دي چې لر او بر افغان ولسونه به څوک جلا نه کړای شي.
پاکستان تور پورې کړی چې پولیس په افغانستان کې وژل شوی، خو پښتانه سیاستوال بیا پاکستان په دروغو تورنوي او وايي چې طاهر داوړ په پاکستان کې وژل شوی او بیا یې جسد ننګرهار ته لېږدول شوی دی.
د عوامي نېشنل ګوند د غړو په وینا چې د طاهر داوړ د وژنې په قضیه کې پاکستاني چارواکي ناسم مالومات ورکوي او اړتیا ده چې تحقیقات وشي.
پښتون ژغورنې غورځنګ ادعا کوي چې د طاهر داوړ په وژنه کې پاکستان لاس لري او که له پښتون وژنې لاس وا نه خلي، خپل عدالت به جوړ کړي.
د طاهر داوړ کورنۍ هم د پاکستان حکومت پړ بولي او له نړیوالې ټولنې د تحقیقاتو غوښتنه کوي.
طاهر داوړ د اکټوبر په اوه ویسشتمه اسلام اباد کې نادرکه شو او د نومبر په دیارلسمه نېټه یې د ننګرهار په دور بابا ولسوالۍ کې جسد وموندل شو.
