روان کال امریکا په افغانستان کې څه باندې پنځه زره هوايي بریدونه کړي.
په سږني خونړي کال کې د جګړې ټولو اړخونو د یو بل د تضعیف لپاره له هیڅ راز امکاناتو کارولو ډډه ونکړه چې له همدې امله په جګړه کې د ښکیلو غاړو تر څنګ د ملکي وګړو د مرګ ژوبلې ګراف هم لوړ وو.
د امریکا له ادرسه تازه خپاره شوي مالومات ښيي چې یوازې په روان کال کې دوی د طالبانو او نورو ډلو په ضد لږ تر لږه پنځه زره هوايي حملې کړي هغه څه چې بې سارې ګڼل کیږي.
د ملکي وګړو د خوندیتوب او عدالت غوښتنې ډله د امریکا هوايي بریدونه تر ډېر بې هدفه ګڼي چې خلک یې ذهني شکنجه کړي دي.
پوځي شنونکي وايي، د امریکا هوايي بریدونه د ګټې پر ځای تاوان ډير لري.
د امریکا د پوځ مرکزي قومندې له قوله یوه خپلواک بنسټ داسې لیکلي (( امریکا تر اوسه هېڅ کله دومره بمونه په افغانستان کې نه دي اچولي، خو سږ کال یې تر ټوله لوړې کچې ته رسولي تر اوسه ۵۲۱۳ بمونه اچولي، تر دې دمخه په ۲۰۱۰ م کال کې ۵۱۰۱ بمونه په افغانستان کې اچولي وو))
په افغانستان کې د ملکي وګړو د خوندیتوب او عدالت غوښتنې ډله وايي، هوایي بریدونه د مرګ ژوبلې تر څنګ افغانانو ته رواني او مالي زیانونه هم اړوي.
د ځمکنۍ جګړې، شپنۍ چاپو تر څنګ د افغان او بهرنیو ځواکونو هوايي بریدونه د طالبانو او نورو ډلو ځپلو لپاره مهم بلل کیږي، خو ځینې پوځي شونکي د بریدونو ناکامي د ناسمې همغږۍ له امله ګڼي.
د ملګرو ملتونو د خپاره شویو راپورونو په اساس د جګړې ټول اړخونه په خپلو جګړیزو تکتیکونو کې د ملکي وګړو ژوند ته پام نه کوي.
هر ځلې د ملکي وګړو د مرګ ژوبلې پړه په طالبانو، ورپسې، حکومت او بهرنیو ځواکونو اچول کیږي خو ټول اړخونه دوی ته منسوبه مرګ ژوبله په لوړه کچه نه مني.
