کلفورنیا کې اورلګېدنې زرګونه هکتاره ځمکه سوځولې.
د امریکا د کلفورنیا په شمال کې په یوه ځنګل کې بیا اورلګیدلی دی.
په دغه اورلګیدنه کې تر اوسه پنځه کسان مړه دي.
ویل کیږي چې د سیمې اوسیدونکو خپل کورونه پریښي او تیښتې ته اړ شوي دي.
د پراډایس په نوم په غرنۍ سیمه کې خلک وايي، د اور لمبو د دوی موټرې هم سوځولي او اوس یې د کورونو د سوځيدو ګواښ هم موجود دی.
د اور وژنې چارواکي وايي، اور لګیدنې تر اوسه نږدې درې زره هکتاره ځمکه سوځولې ده.
کلفورنیا کې د کال له پیله اورلګیدنې پیل شوي چې ګڼې ځنګلي سیمې یې تر اوسه سوځولي او زرګونه کسان یې له خپلو کورونو وتلو ته اړ کړي دي.
