افغان امنیتي او دفاعي ځواکونو وښوده چې د خپلې خاورې او خلکو ساتنه کولی شي.
ملي دفاع وزارت وایي، سره له دې چې وسله والو هوډ درلود د ټاکنو پروسه ګډوډه کړي، خو د ولسي جرګې ټاکنې په بریا ترسره شوې.
د ټاکنو په دوه ورځو کې ۲۵۰ بریدونه شوي چې نږدې اتیا د ملي اردو سرتیرو ته یې مرګ ژوبله اړولې ده.
د ملي دفاع وزیر طارق شاه بهرامي وایي، د څلور کلن پلان په پلې کېدو به ځواکونه لاپیاوړي او د کمانډو شمېر به دوه برابره لوړ شي.
د ولسي جرګې د ټاکنو په مهال د ملي دفاع وزارت درې اساسي دندې درلودې چې د ملي پولیسو او ملي امنیت ملاتړ، د ټاکنو ترسره کېدو مخکې او وروسته عمومي او ځانګړي عملیات کول او د هېواد ټولو برخو ته د ټاکنیزو موادو انتقال چې د ملي دفاع وزیر په وینا درې واړه دندې په سمه توګه ترسره شوې.
د ملي دفاع وزیر طارق شاه بهرامي له شمشاد سره په ځانګړې مرکه کې وویل، د ټاکنو په دوه ورځو کې وسله والو ۲۵۰ بریدونه کړي، چې ۴۸۸ کسانو ته یې مرګژوبله اړولې او ډیری یې ملکیان دي.
دغه راز بهرامي وویل، په بریدونو کې تر ۱۸ ملي اردو سرتیري وژل شوي او تر ۶۰ نور ټپیان شوي دي.
د ټاکنو ورخو په مهال لوړ ګواښونه په ختیځ زون، کندز او بغلان ولایتونو کې وو، چې د تخنیکي او امنیتی ستونزو له امله د یو شمېر سیمو ټاکنې هم ونه شوې.
دفاع وزارت وایي، د څلور کلن پلان موخه یې د کمانډو او هوايي ځواکونو ظرفیت او کمیت لوړول دي چې اوسمهال درې برابره زیات شوي.
دغه راز د څلور کلن پلان بله موخه د سرحدي او عامه نظم ځواکونه له کورنیو چارو وزارت څخه ملي دفاع وزارت ته لیږدول دي چې ترسره شوي او اوسمهال یې په اصلاحاتو او تشکیلاتي جوړښت او تجهیز کار روان دی.
ملي دفاع وزیر طارق شاه بهرامي وايي، د ملکي تلفاتو د مخنیوي په موخه د ملي اردو سرتیرو ته روزنیز کورسونه او سیمنارونه جوړ کړي چې په وینا یې ښه نتیجه یې ورکړي او د تیر په پرتله اوس د ملي اردو لخوا د ملکي تلفاتو کچه کمه شوې ده.
