ننګرهار ولایت مرکز جلال اباد ښار د پښګرانو(اهنګرانو) کوڅه کې سلګونه کسان پر پښګرۍ بوخت دي او د همدې کسب له لارې خپلې کورنۍ ته عاید ګټي.
پښګران وايي، ننګرهار کې دغه کسب د پخوا په پرتله غوړېدلی او هغه توکي چې په لوړ قیمت او ټیټ کیفیت له پاکستان او چین واردېږي، دوی یې همدلته په ښه کیفیت او مناسبه بيه جوړوي.
پښګر شمسالدین وايي: « پخوا هر څه له پېښوره راتلل، خو اوس د اړتیا وړ ټول توکي دلته جوړېږي، دلته ښې ډېرې کارخونې فعالې دي.»
پښګر غلام محمد وايي: « پخوا به زموږ لپاره بېچلې، کولنګونه او نور توکي له بهره راتلل، خو اوس هرڅه دلته تولیدېږي. همدارنګه لاس ګاډي (کراچۍ) به هم له بهره راتلې او موږ ته ډېر قېمته پرېوتل، خو اوس په ښه کیفیت دلته جوړېږي او موږ هم د خپل وطن تولیدات اخلو.»
دوی د ډبرو سکرو د بیو لوړوالی او له بهره د عوضي توکو واردېدل د خپلو توليداتو پر زيان بولي او ټینګار کوي چې پر يادو توکو دې تعرفه لوړه شي.
د نواب خان په نوم پښګر وايي: « زموږ غوښتنه دا ده چې له بهره وارېدونکي توکي دې بند کړي ترڅو خلک زموږ په لاس تولید شوي توکي واخلي. موږ دلته له بېلچو نیولې تر رمبي پورې هرڅه تولیدوو.»
غلام محمد پښګر په دې اړه وايي: « که دلته د تولید کېدونکو توکو په څېر وارداتي توکو باندې تعرفې لوړې شي، دا زموږ کاروبار به وچلېږي او په دې سره به د ډېرو خلکو کاروبار ښه شي.»
د ننګرهار ځايي مسوولین وايي، د صنعت کارانو ملاتړ ته ژمن دي او بازارونو کې له منظمې ارزونې وورسته به د اړتيا په صورت کې پر عوضي توکو ګمرکي تعرفه لوړه کړي.
د ننګرهار د صنعت او سوداګرۍ ریاست کې د سوداګریزو چارو آمر شاکرالله ستانکزی وايي: « په هر قلم توکو کې چې افغانستان پرځان بسیا شوی، موږ په خارجي پخو اموالو باندې تعرفه لوړه کړې. موږ به د بازار ارزونه وکړو او له هغې وروسته به ولایت مقام ته د خلکو دا غوښتنه ولېږو. د مقام له لارښوونو سره سم به اجراأت هم وشي.»
کسبګر او خلک غوښتنه کوي چې سرپرست حکومت باید داخلي تولیداتو ته د بازار مومندنې او ملاتړ په موخه له بهره پر واردېدونکو عوضي توکو تعرفه لوړه کړي، ترڅو د صنعتکارانو روزګار لا وغوړېږي.
