مجاهد ویلي،اوس پر دې کار روان دی،چې نصاب ته سمون ورکړي،ښوونځيو ته د نجونو د تګ راتګ لپاره تدابیر ونیسي،جلا ښوونیز او معیاري سیستم رامنځ ته کړي.
د مجاهد په خبره، له دغو هڅو یې موخه داده،چې د خپل ولس ذهن د نجونو له زده کړو سره له مخالفت راوګرځوي.
مجاهد زیاته کړې:«د نجونو پرمخ به تر شپږم ټولګي پورته ښوونځي حتمي خلاصیږي. موږ د هغوی د نصاب په سمون، د تګ راتګ لپاره د ترانسپورټي وسایلو په چمتو کولو او د هغوی لپاره د جلا ښوونیز او معیاري سیسټم پر جوړولو بوخت یوو،ترڅو وکولی شو،خپل ولسونه ذهنا د نجونو د زده کړو له مخالفته را واړوو.»
د کابل اوسېدونکي وايي، ولس د نجونو له زده کړو سره مخالف نه دی او نه هم ښوونځي د ولس له لوري تړل شوي دي، افغان ولس تل د خپلو بچیانو پر زده کړو ټینګار کړی دی.
دوی وايي، ولسونه هم د علم زده کړه فرض ګڼي او نه غواړي،خوندې او میندې یې له زده کړو بې برخې وي.
