د ډسمبر نهمه له اداري فساد سره د مبارزې له نړیوالې ورځې سره برابره ده. دا ورځ داسې مهال نماځل کېږي چې افغانستان له څو لسيزو راهیسې او په ځانګړې توګه له ۲۰۰۱ کال راهيسې د نړيوالو ارزونو پر بنسټ، د اداري فساد له امله سخت اغېزمن شوی.
د سیاسي چارو کارپوهان که څه هم په تېرو درېيو کلونو کې له اداري فساد سره شوې مبارزه مثبته ارزوي، خو زياتوي چې په کار ده چې سرپرست حکومت په دولتي ادارو کې د اداري فساد مخنيوي لپاره مسلکي کسانو ګومارنې ته لومړيتوب ورکړي.
د سیاسي چارو کارپوه فیض محمد ځلاند وايي: « په دې برخه کې لکه څرنګه چې لازمه وه ګامونه پورته شوی وای، لا نه دي پورته شوي. لاهم ګومارنې د خپل پالنې، ملګرتیا او انډیوالۍ پر اساس کېږي. متخصص کادرونه یا څنګ ته شوي یا له هېواده وځي او یا هم نه ګومارل کېږي. همدارنګه موږ د متخصصو کادرونو د روزنې لپاره هم پروګرامونه په پام کې نه لرو. دغو کارونه خپله مالي فساد ته زمینه برابره کړې.»
د سیاسي چارو کارپوه اخترمحمد راسخ وايي: « اداري فساد په افغانستان کې ډېره اوږده سابقه او تاریخي مخینه لري او زموږ له نظامونو سره موجود و او د همدې اداري فساد له امله زموږ نظامونه ړنګ شول.»
بله خوا د سرپرست حکومت مرستیال ویاند وايي، په افغانستان کې د اداري فساد پر وړاندې جدې مبارزه شوې او په دې برخه کې لاهم هڅې روانې دي.
د اسلامي امارت د وياند مرستیال حمد الله فطرت وايي: « اسلامي امارت د فساد پدیدې د ریشه کنۍ لپاره پوره مصمم دی او په پراخه کچه او جدي توګه له فساد سره مبارزه کوي؛ ترڅو په ادارو کې فساد صفر ته ټیټ کړي.»
د روڼتیا څار نړیوال سازمان له خوا د فساد په نړیوال شاخص کې پر فساد ککړو هېوادونو د روان کال په ډلبندۍ کې افغانستان د ۲۰۲۲ کال په پرتله ۱۲ درجې راښکته شوی او ۱۶۲ ځای يې خپل کړی.
دغه سازمان د ۲۰۲۳ کال په کلني راپور کې د نړۍ په ۱۸۰ هېوادونو کې د اداري فساد کچه ارزولې او درجه بندي کړې ده چې له دې ډلې افغانستان له ۱۰۰ امتیازونو څخه د ۲۰ امتیازونو په لرلو سره، ۱۶۲ ځای لري.
