له فارن پالیسۍ سره خبرو کې دغو پخوانیو افغان سرتیرو ویلي، دوی بې دندې، بې کوره او ناامیده دي او هغوی چې بهرته اېستل شوي هم بې برخلیکه پاتې دي.
هغوی زیاته کړې،دا چې له سخت وضعیت سره مخ دي او د روسیې له خوا ورته د ښه معاش وړاندیز شوی،نو بله هېڅ لار نه لري،چې دا وړاندیز ونه مني.
د افغان پوځ یو پخوانی سرتیری وايي:« دوی اوس بې کاره، بې کوره او نا امیده دي او هېڅ شی له لاسه ورکولو لپاره نه لري. ډېری کومانډو لاهم په متحده ایالتو یا بریټانیا کې د میشتیدو په تمه دي. دوی په یوه سخت وضعیت کي دي،نو حتما به د دندې وړاندیز مني. دا چې دوی هره ورځ پاکستان، ایران او یا ترکیه کې د کار پیدا کولو لپاره پيسې مصرفوي او اوس ورته د روسیې له خوا د ۱۰۰۰ ډالرو معاش وړاندیز شوی،هېڅکله به یې رد نه کړي.»
په ورته وخت کې دغه پخواني افغان سرتیري له امریکا او متحدیونو یې سر ټکوي او سخت ناامیده دي. دوی له فارن پالیسي سره خبرو کې ویلي باید د لویدیځ لخوا بهر ته ایستل شوي وی او د روسیې پر ځای اوکراین ته لیږل شوي وی.
هغوی ویلي، روسیه یې دوښمنه ده او لیوال ول، چې اوکرایني ځواکونو سره یو ځای شوي وی،خو اوس اړ دي روسیې ته ولاړ شي.
د افغان پوځ یو پځوانی سرتیری وايي:« دوی باید د لویدیځ متحدینو له خوا د اوکراینیانو تر څنګ د جګړې لپاره غوره او وکارول شي. دوی نه غواړي، د روسانو لپاره جګړه وکړي. روسان زموږ دښمنان دي، خو اوس دوی بله کومه لاره نه لري.»
د روسیې له خوا د افغانستان د پوځ پخوانیو سرتیرو ته د دندو وړاندیز پر سر خبرې داسې مهال کیږي،چې له وړاندې راپورونه ول، چې امریکا له ځان سره اېستلي زرګونه افغان ځواکونه د اوکراین جکړې ته لیږلي دي.
