پر افغانستان د اسلامی امارت له بیا واکمنېدو وروسته، د نړيوالو بنسټونو او سازمانونو له لورې د پیل شويو لسګونه پروژو چارې نیمګړې پاتې او دا مهال پر ټپه ولاړې دي.
د ټولګټو چارو وزارت مسوولین وايي، له سیاسي تحول وروسته د نړیوالو بندیزونو د دوی پر کارونو منفي اغېز کړی او له تېرو کلونو راهیسې۵۲ پروژې چې د نړیوال بانک، آسیا پراختیایي بانک او ایټالیا فنډ له لوري تمویل کېدې، کارونه یې نېمګړي پاتې دي.
د دغه وزارت مرستيال مولوي عبدالکریم فاتح له یادو نړيوالو بنستونو غواړي چې د نيمه کاره پروژو چارې بېرته پیل او پای ته ورسوي.
فاتح په دې اړه وايي،: « د ټولګټو چارو وزارت اړوند پروژو له ډلې، ۵۲ پروژې پر ټپه درېدلې دي. د دغو پروژو له ډلې یو شمېر یې د عاجلې اړتیا له مخې د ټولګټو وزارت له خوا بېرته پیل شوې، خو ډېرې یې لا نه دي پيل شوې. د بېلګې په توګه د حلقوي سړک پاتې برخه او د کابل جلا آباد دویم لین سړک چې د نړیوالو پروژې وې او د خلکو اړتیا له امله د ټولګټو وزارت له خوا پيل شوې دي.»
د ټولګټو وزارت مرستيال له شمشاد سره په ځانګړې مرکه کې څرګنده کړې چې اوس مهال په ټول هېواد کې د بیا رغونې په برخه کې نږدي ۵۰۰ پروژو کارونه دوام لري چې د روان لمریز کال تر پایه به د ۱۳۵ پروژو چارې بشپړې او ګټې اخیستنې ته وسپارل شي.
فاتح زیاتوي: « د حفظ او مراقبت په برخه کې له ۱۳۵ تر ۱۴۰ پروژې بشپړې شوې یا بشپړېږي. په غټو اساسي پروژو کې د کابل – کندهار لویه لاره ده چې بشپړېدو ته نیږدې شوې او یو شمېر نورې پروژې به تر راتلونکو دوو کالو بشپړې شي.»
د ټولګټو چارو وزارت مرستیال د سالنګ لویې لارې په اړه وايي، د دغې لارې د اساسي بیا رغونې په لړ کې د ۱۱ کیلو مټرو چارې بشپړې شوې او راتلونکو دوو اوونیو کې به د هر ډول ټرافیکو پرمخ پرانیستل شي.
فاتح په دې اړه وايي: « سږ کال چې څومره موږ پلان کړی و، په هغو کې یو شمېر ګالرۍ او څه هم د ګالریو منځ کې سړکونه، د پلان مطابق کار بشپړ شوی. په دې کار کې د سالنګ تونل دواړو خواو ته ګالرۍ او سړکونه شامل دي چې سیخ لرونکی کانکرېټ په کې اچول شوی.»
د ټولګټو چارو وزارت مرستیال په خبره، د سالنګ لويه لار د حق العبور په بدل کې رغول کیږي. نوموړی زیاتوي، د ټولپلازې په واسطه راټولې شوې پیسې د يوې شفافې پروسې له لارې بانکي حساب ته جمع کيږي.
خو په دې اړه له څه ویلو ډده کوي چې په تېر يوه کال له دې لارې څومره پیسې راټولې شوې دي.
ټولګټو چارو وزارت مرستیال مولوي عبدالکریم فاتح وايي: « د ټولپلازې اړوند کتابچې د مالیې وزارت له خوا په حساب راکول کېږي او بېرته یې حساب غواړي. هره اوونۍ دوه یا درې ځله محاسبه کېږي او له محاسبې سره سم پيسې بانک ته سپارل کېږي. له بانک بېرته ماليې وزارت ته ځي او بیا د انوایس په بڼه شرکتونو ته انتقالېږي.»
په هېواد کې د لویو لارو بیا جوړېدنه او پرمختګ د هېواد د اقتصادي ودې او د خلکو د هوساینې لپاره حیاتي ارزښت لري.
د ټولګټو وزارت مسوولينو په خبره، د کابل جلال آباد لویې لارې د دویم لین سړک د رغونې چارې په بګرامیو سیمه کې هم پیل شوې او دا ستره پروژه په کاري لومړیتوبونو کې ځای لري.
