د اسلامي امارت د پوهنې وزرات سرپرست سید حبیب الله آغا وایي، د انکشافي بودیجې د نه شتوالي له امله تر ډېره د پوهنې په برخه کې ودانیز کارونه نه شي ترسره کولی، خو په خبره یې په تېرو درېيو کلونو کې د بېلابېلو موسساتو په همکارۍ د هېواد پر کچه د ۱ زر ۴۰۰ ښوونځيو لپاره نوې ودانۍ جوړې شوې دي.
هغه په دې اړه وايي: « له اسلامي امارت سره د تعمیراتو جوړولو بودیجه نه شته او که وي هم ډېره کمه ده. موږ عادي بودیجه لرو، خو د معارف انکشافي بودیجه په نشت حساب ده. موږ په دې اړه هر کال له موسسو سره خبرې کوو.»
سرپرست وزیر له شمشاد سره په خبرو کې مني چې په لرو پرتو سیمو کې د مخکېني حکومت پرمهال د ښوونکو د ګومارنې او ځينو نورو برخو کې د غېرعادلانه وېش له امله د هېواد ډېری سیمې د معارف له پوښښ محرومې پاتې دي.
د سید حبیب الله آغا په خبره، پوهنې وزارت هڅه کوي ترڅو په ټولو سیمو کې د یوه منظم چوکاټ له مخې شته ستونزې هوارې کړي.
هغه زیاتوي: « په تېر نظام کې په ډېرې بې انصافۍ سره دا توزېع شوې، ډېر زیات بستونه لرو، سپين بستونه هم لرو؛ اوس یې موږ په ډېر حکمت راټولوو. موږ نه شو کولی له هغو کسانو دا بستونه واخلو؛ ځکه چې د خلکو احساسات راپاروي.»
د پوهنې وزارت سرپرست د نوي نصاب د چاپ او چمتو کېدو خبر هم ورکوي او زیاتوي، تر دریېم ټولګي پورې د سیمه ییزو ټولګیو او دغه راز تر شپږم ټولګي پورې د لومړنۍ یا ابتدائيه دروې نوی تعليمي نصاب چمتو شوی چې د مشرتابه تر منظورۍ وروسته به چاپ او پر زده کوونکو ووېشل شي.
د پوهنې وزارت سرپرست په دې اړه وايي: « د یوه انګرېز تاریخ به یې راوړی و، یا د یوه امریکايي تاریخ، زه انګرېز او امریکايي څه کوم بلکې زه خپل اتلان او قهرمانان لرم او زه خپل یو قهرمان په دا ټوله امریکا یې نه ورکوم. دا ټول مو له نصاب ویستل او خپل مو په کې راوستل. همدارنګه د پخواني نصاب دیني برخه کمزورې وه، هغه مو لږ ور زیاته کړه.»
د پوهنې وزارت سرپرست په خبره، وزارت یې د زده کړو په برخه کې د ټولو شته ستونزو د هوارولو لپاره کار کوي او ژر به لرې پرتو سیمو کې د زده کړو ته د هېوادوالو لاس رسی ډېر او د معارف پر وړاندې اوسنۍ ستونزې راکمې شي.
