د کندهار ښار په دوهمه عینومېنه کې د زیتونو باغونه تازه حاصل ته رسېدلي دي.
د باغونو بڼوال وايي دغه ولایت کې زیتون ښه حاصل ورکوي، بیې یې ښې دي او په خبره یې که کروندګر ورته مخه کړې نو د نورو کښتونو پرتله ښه ګټه به وکړي.
د نورعلي په نوم د زیتونو بڼوال وايي: « تېر کال زموږ بڼ ۸۰ ټنه زیتون وکړل او سږ کال تمه لرو چې ۲۵ ټنه حاصلات راټول کړو.»
په عینو مېنه کې د زیتونو دا بڼ د افکو کمپنۍ له خوا ۱۰ کاله وړاندې پر۱۵۴ جریبه ځمکه جوړ شو چې په کې شاوخوا ۶۰ زره د زیتونو ونې کېنول شوې، خو حاصلات یې هر کال د پروسېس لپاره جلال اباد ښار ته استول کیږي.
د کندهار بڼوال وايي، دغه کار د زیات لګښت سبب شوی.
دوی له سرپرست حکومته غوښتنه کوي چې په کندهار کې د زیتونو بڼوالۍ د دود کېدو او همدلته د پروسېس لپاره هڅې وکړي.
د عینو مېنو زیتونو بڼوال حسن مبارک وايي: « د زیتونو ورایټي سیسټم باید دلته راوړل شي او په کندهار کې ترویج شي. که اسلامي امارت وي یا کوم بل دولت باید موږ سره همکاري وکړي او د پروسېس لپاره کارخونه جوړه کړي. که دا زیتون د درملو لپاره کارول کېږي یا د تېلو او یا یې هم کونجاړه وځي، باید همدلته وشي. اوس موږ خپل حاصلات جلال اباد ته وړو او تر هغه ځایه ډېر ګران تمامېږي.»
له بلې خوا، د کندهار کرنې ریاست مسوولین وايي، په دې ولایت کې اوس مهال د زیتونو یوازې یو لوی باغ او څه نور کوچني باغونه شته چې ټولیز مساحت یې۱۶۰ جریبه کېږي.
د دوی په خبره، سږکال به له دغو باغونو شاوخوا ۲۵ ټنه حاصلات راټول شي.
د دغه ریاست د مېوه جاتو او سبزیجاتو د پراختیا برخې مسوول انجنیر ایمل حکیمي وايي، زیتون کندهار کې ډېر نه دي ترویج شوي، خو که کروندګر ورته مخه کړي، نو دوی به د پروسېس په برخه کې اسانتیاوې ورته رامنځته کړي.
حکیمي په دې اړه وايي:« زیتون ډېر ګټور او ښه حاصل لرونکی بوټی یا ونه ده او دغه راز د وچکالۍ په مقابل کې ښه مقاومت لري. زیتون د کندهار ولایت یا ټول سوېل زون له آب او هوا سره توافق کوي او ښه نتیجه ورکوي. موږ جګ پوړو چارواکو ته وړاندیز کوو چې دلته د پروسېس کارخونې جوړې شي. که څه هم موږ وړاندې دا غوښتنې کړې دي، خو د چارواکو له خوا ساحه کتل شوې، دلته د زیتونو باغونه کم دي، خو که چېرې لا مروج شي، تمه شته چې د پروسېس لپاره یې ماشین یا کارخانه هم جوړه شي.»
د زیتونو ډېر باغونه دا مهال په ننګرهار ولایت کې دي او هلته يي د پروسېس لپاره کارخونې هم شته؛ خو اوس د کندهار په ګډون یو شمېر نورو ولایتونو کې هم د پراختیا او ترویج په حال کې دي.
