د قطر په پلازمېنه دوحه کې د شاوخوا ۱۲۰ هېوادونو او نړیوالو سازمانونو استازي، مشران، پالیسي جوړونکي، د سیاست او اقتصاد برخې متخصصین تر یوه چت لاندې سره راټول شوي، ترڅو په نړۍ کې پر روانو ستونزو او ننګونو بحث وکړي.
دغه ناسته چې د ګډون په موخه په کې د ګڼو هېوادونو ولسمشران هم وار د مخه دوحې ته رسېدلي، د شنبې په ورځ (د ۱۴۰۳ کال د لیندۍ پر ۱۷) د قطر امیر تمیم بن حمد الثاني په وینا رسماً پیل شوه.
د قطر لومړي وزیر د خپلې وینا پرمهال په نړۍ کې روانو کشمکشونو ته په اشارې، دغه ناسته یې د حل لارو موندلو لپاره یو ښه فرصت بللی.
د قطر لومړی وزیر شیخ محمد بن عبدالرحمن آل ثاني وايي: « نن موږ د نړۍ لپاره په یوې برخلیک ټاکونکې څلور لارې کې سره راغونډ شوي یو. یا به د تاوتریخوالي دورې ته غاړه ږدو یا به داسې نوي میتودونه او حللارې ایجادوو چې ورسره نه یوازې دغو تاوتریخوالو ته د پای ټکی کېښودل شي بلکې د راتلونکي نسل د امنیت او ثبات لپاره پایښت لرونکې سوله او مساویانه سوکالي تضمین کړي.»
د دوحې فورم موخې بشري ناورین، ټکنالوژیکو پرمختګونو، د سولې او اقتصاد په برخه کې نړیوالو ننګونو ته په نوې بڼه رسېدنه او ورته د حللارو موندل بلل کیږي.
په دې ناسته کې د تېرې هغې په څېر که څه هم د سرپرست حکومت استازي ته بلنه نه ده ورکړل شوې، خو داسې انګېرل کېږي چې د افغانستان قضیه او روان حالات به د نړۍ مشرانو د بحث اجنډا وي.
د سیاسي چارو شنونکی اخترمحمد راسخ وايي: « په دوحه کې د سیمې د ناخوالو، اقتصادي او نظامي بحرانونو لپاره د حل لارو موندلو لپاره خبرې کېږي. زه ویلی شم چې د افغانستان موضوع به هم د دې غونډې په اجنډا کې د توجه وړ وي او پرېکړې به کېږي.»
ځینې نور بیا دغه ډول ناستې د نړۍ مسایلو په تړاو پر نیول شویو پرېکړو د بیا کتنې لپاره حیاتي ګڼي چې افغانستان یې هم یوه مهمه برخه ده.
د دوی په باور په دې ناسته کې تېرې ناستې ته په کتو، ښايي په افغانستان کې د سیاسي موضوعاتو سربېره د ښځو پر زده کړو، کار او د بشري حقونو پر روان وضعیت هم بحثونه ترسره شي.
د سیاسي چارو شنونکی شهسوار سنګروال وايي: « څومره چې د افغانستان مساله ده، په تېره ناسته کې هم تقریبا ً افغانستان ته اشاره وشوه او هغه بشري ناورین چې په افغانستان، سیمه او نړۍ کې موجود دی، یوه ارزونه او یادونه یې وشوه. دا ځل هم شاید د افغانستان پر اقتصادي، سیاسي او نورو اړخونو خبرې وشي.»
د دوحې فورم ۲۲مه ناسته داسې مهال په قطر کې نړیوالو ننګونو او کرګېچ ته د حل موندلو په موخه پیل کېږي چې د غزې ناورین په ګډون په منځني ختیځ او په ځانګړي ډول لبنان او سوریه کې جګړو زور اخیستی او ښايي نوي پړاو ته دننه شي.
وبه لیدل شي چې په دې ناسته کې د نړۍ مشران یادو کشالو ته د حللارو پر موندلو بریالي کيږي او که نه.
