ترکیه کې د علماوو ناستې ګډونوال: له اسلامي هېوادونو غواړو له ا.ا سره نږدې اړیکې وساتي

په ترکیه کې د دیني علماوو دوه ورځينۍ ناستې په یوه خبرپاڼه کې له اسلامي هېوادونو غوښتي  دي، چې د افغانستان له نوي نظام سره نږدې اړیکې وساتي. 

 خبرپاڼه کې راغلي، چې اسلامي هېوادونه باید له اسلامي امارت سره سیاسي، اقتصادي او کلتوري اړیکې ټینګې کړي او په نړیوال مشروعیت کې یې د اسلامي هېوادونو رول مهم بللی دی.

اخوا د سیاسي چارو یو شمېر کارپوهان بیا په دې باور دي، که اسلامي نړۍ د افغانستان د اوسني حکومت د رسمیت پیژندنې لپاره یو دریځ غوره کړي، نوره نړۍ به هم اوسنی سرپرست حکومت پر رسمیت وپیژني او افغانستان به له سیاسي او اقتصادي انزوا واېستل شي.

د سیاسي چارو کارپوه سرور نیازی وايي:« د دیني علماوو ناسته په ترکیه کې د افغانستان لپاره ښه فرصت دی، چې باید ترې ګټه واخلي، که ټول اسلامي هېوادونه د افغانستان د رسمیت پیژندنې پریکړه وکړي، نو غیراسلامي هېوادونه به هم بیا د افغانستان رسمیت پیژندنې لپاره زړه ښه کړي.»

خو ځینې نور بیا په دې باور دي، چې په ځینې پریکړو کې اسلامي هېوادونه خپلواک نه دي.

دوی وايي، ټوله اسلامي نړۍ د مریکا د سیاسي تسلط تر سیوري لاندې ده او په خپل سر نه‌ شي کولی، چې د افغانستان اوسنی نظام پر رسمیت وپیژني.

د سیاسي چارو کارپوه هاتف مختار وايي:« په فرهنګي او دیني برخو کې له افغانستان سره تعلق مثبت واقع کیدای شي، خو په سیاسي لحاظ نړۍ او په ځانګړي ډول اسلامي هېوادونه د امریکا تر سیوري لاندې دي، کله چې امریکا اسلامي امارت پر رسمیت ونه پیژني او اسلامي امارت د نړیوال بې طرفه سیاست تعریف ونه لري، فکر نه کوم چې اسلامي هېوادونه اسلامي امارت پر رسمیت وپیژني.»

د ترکیې د دیني علماوو ناسته کې د اسلامي امارت ویاند ذبیح الله مجاهد ګډون کړی وه او دغې ناستې ته یې په خپله وینا کې ژمنه ښودلې وه، چې د نجونو ښوونځي به پرانېستل شي، هغه څه چې د رسمیت پيژندنې لپاره د نړیوالو له لوري د شرط په توګه وړاندې شوي وه.