له څه باندې درېيو کلونو راهيسې له سرپرست حکومت سره د ايران اړيکو د سيمې نورو هېوادونو په څېر عادي پر مخ روانې دي، خو تازه په کابل کې د دې هېواد شارژدافیرعلي رضا بېګدلي ویلي، هېواد يې د اړيکو پر اوسنۍ کچې بسنه نه کوي او غواړي لا پراختيا ورکړي.
نوموړي دا څرګندونې په کابل کې د بهرنيو چارو وزارت له سرپرست مولوي امیرخان متقي سره د معرفي کېدو ليدنې پرمهال کړې او زياته کړې يې ده، د يادو اړيکو پراختيا لپاره غواړي په نږدې راتلونکې کې کابل او تهران ته د دواړو هېوادونو د لوړ پوړو پلاويو سفرونه تنظيم کړي.
د بهرنیو چارو وزارت مرستیال ویاند ضیاء احمد تکل په دې اړه وايي: « هیله یې څرګنده کړه چې وکولی شي د خپل ماموریت په موده کې د دواړو هېوادونو اړیکې په بېلابېلو برخو کې لا پياوړې کړي. همدارنګه د ایران نوي سفیر دا هم وویل چې د اړیکو لا پراختیا لپاره غواړي چې د دواړو هېوادونو ترمنځ د جګ پوړو پلاویو سفرونه ترسره شي.»
تکل وايي، لیدنه کې مولوي امیرخان متقي هم ډاډ ورکړی چې کابل له تهران سره د متقابلو اړيکو پراختيا کې همکارۍ ته ژمن دی.
هغه زیاتوي: « بهرنیو چارو وزارت به ورسره د اړوند چارو په ښه ترسره کولو کې همکاري کوي.»
ايران په تېره نومبر میاشت کې د افغانستان لپاره خپل ځانګړی استازی او شارژدافیر له دندې لرې او عليرضا بېګدلي يې يوازې کابل کې خپل شارژدافیر وګوماره.
پوښتنه دا ده چې نوموړی به څومره د افغانستان او ايران د اړيکو په پراخولو کې بريالی شي؟
د نړیوالو اړیکو کارپوه نجیب الرحمن شمال وايي: « افغان کډوال تمویل کړي او افغانستان ته په خپله خوښه د هغوی د بېرته راستنېدو لپاره زمینه برابره کړي.»
ځينې نور بیا وايي، د کابل او تهران ترمنځ د اړيکو احتمالي پراختيا ته خوشبين دي او وايي، په دې توګه به په ايران کې د افغانانو د اعدام مخنيوي ترڅنګ، هلته له مېشتو افغانانو سره د پوليسو ناسم چلن هم بدل شي.
د سیاسي چارو کارپوه محمد سلیم پیګیر وايي: « د افغانستان بهرنیو چارو وزارت باید د ایران له سفیر سره د اعدامونو او په ایران کې د افغان کډوالو د شکنجو په اړه سپینې خبرې وکړي او له هغوی ژمنې ترلاسه کړي.»
له دې وړاندې، د افغانستان په اوبو کې د حق غوښتنې او کډوالو په سر د دواړو هېوادونو د چارواکو ترمنځ تند دريځونه تبادله شوي؛ ان تر دې چې د پولو سرغړونو له امله د دواړو هېوادونو د پوله ساتو ځواکونو ترمنځ نښتې هم شوې دي.
