د لوی اختر په مناسبت د افغانستان لپاره د ملګرو ملتونو استازولۍ او په کور دننه او بهر افغان سیاسیونو افغان ولس ته پهخپلو اختریزو پیغامونو کې د مبارکۍ ترڅنګ هیلې څرګندې کړي دي.
د افغانستان لپاره د ملګرو ملتونو ځانګړې استازې په اختریز پیغام کې افغانانو ته مبارکي ویلې او د با ثباته او سوله ییز افغانستان لپاره یې په ګډ کار ټینګار کړی دی.
اوتونبایوا زیاته کړې:« د نېکمرغه لوی اختر د رارسېدو په مناسبت افغانانو ته مبارکي وایم. هېله لرم چې د لوی اختر روحیه تلپاتې وي او موږ ټول وهڅوي چې د یوه سوله ییز او سوکاله افغانستان لپاره پر ګډه کار ته دوام ورکړو.»
د افغانستان پخواني ولسمشر حامد کرزي هم هېوادوالو ته د اختر مبارکۍ ترڅنګ له اسلامي امارت غوښتنه کړې چې په هېواد کې د دایمې سولې او ثبات لپاره کوټلي ګامونه واخلي.
کرزي زیاته کړې:« د افغانستان ټول متدین ملت ته د لوی اختر مبارکي وایم. دا زموږ دنده ده چې د افغانستان د سرلوړۍ لپاره پر ګډه کار وکړو. افغانانو څو لیسزې د سولې فرصتونه له لاسه ورکړي او له بېلابېلو ستونزو سره مخ دي، اوس له اسلامي امارته غواړم چې د تفاهم او ملي خبرو اترو له لارې دغه ستر هدف درک کړي، څو ټول هېوادوال د اعتماد او مالکیت په احساس را ټول شي او د ورورګلوۍ، په هېواد کې د دایمي سولې او ثبات، د علم او پوهې او پر ځان بسیاینې برخه کې نوښت وکړو.»
بل لور ته د مخکېني حکومت ملي روغې جوړې سترې شورا مشر ډاکټر عبدالله عبدالله په اختریز پيغام کې هېوادوالو ته مبارکي ویلي او له نړۍ والې ټولنې یې غوښتي چې د افغانستان اقتصادي وضعیت ته په کتو دې له افغانانو سره خپلو مرستو ته دوام ورکړي.
هغه زیاته کړې:« ټولو هېوادوالو ته د اختر مبارکۍ ترڅنګ تمه لرم چې د لوی اختر د ورځو په برکت چې د قربانۍ، فداکارۍ، زغم او منځلارۍ بېلګه ده، په هېواد کې د ټولو قومونو ترمنځ د همپالنې، د هېواد د پرمختګ او ابادۍ زمینه برابره شي. موږ تمه لرو چې نړیواله ټولنه د افغانانو بد اقتصادي وضعیت په درک کولو سره خپلو مرستو او ملاتړ ته دوام ورکړي.»
د حزب اسلامي مشر انجنیر ګلبدین حکمتیار هم د لوی اختر په مناسبت د مبارکۍ پیغام خپور کړی.
حکمتیار په دغه اختزیز پیغام کې څلور وړاندیزونه کړي دي:« ۱- د یوې شورا جوړول چې د ملي یووالي ممثله وي. دا شورا به هره برخه کې د تصمیم نیولو آخري مرجع وي.
۲- اساسي قانون جوړول.
۳- نمونه اسلامي نظام جوړول.
۴- نوی تعلیمي نصاب جوړول، داسې چې مدرسه او مکتب سره یو کړي او صرف د تخصص دورې سره جدا وي.»
له یوناما او افغان سیاسیونو سربېره د اسلاميامارت لوړپوړو چارواکو هم په اختریزو پيغامونو کې د افغانانو پر یووالي، دایمي ثبات لپاره پر ګډ کار ټینګار کړی دی.
