امریکا ویلي، د ۲۰۲۱م کال له اکتوبر میاشتې راهیسې يې د افغان کډوالو د ملاتړ لپاره پاکستاني بنسټونو ته له ۷۵ میلیونو ډالرو ډېرې پیسې ورکړي دي.
په پاکستان کې د امریکا سفارت ویلي، هغو همکارانو د مننې او هرکلي لپاره یې سره ناسته کړې، چې د تېرو دوو کلونو پرمهال یې د تازه ورغلو افغان کډوالو خدمت کړی دی.
د امریکا د ۷۵ مېلیونو ډالرو مرستې ته په کتو، پاکستان کې مېشتو افغان کډوالو بیا ویلي، چې له قانوني اسنادو سره سره هلته د لازمې مرستې پر ځای په یوه او بله بهانه نیول کېږي، ځورول کېږي او لاسنیوی یې نه کیږي.
دا په داسې حال کې ده، چې پاکستان د افغان کډوالو تر ټولو ستر کوربه هېواد بلل کیږي خو له کډوالو سره د چلن پر څرنګوالي او سیاسي استفادې پرې نیوکې موجودې دي.
