د امریکا بهرنیو چارو وزارت په سوریې کې د وسله والو غورځنګونو د ائتلاف په اړه د دې هېواد راتلونکو پالیسيو او له افغانستان سره د رسمي تعامل د نه موجودیت په اړه ویلي، واشنګټن له نړیوالې ټولنې سره جوخت یو لړ شرایطو ته پام له ځېنو هېوادونو سره د رسمي اړیکو له رامنځته کولو ډډه کړې ده.
د دغه وزارت ویاند متیو مېلر وايي، که د سوريې نوی حکومت غواړي له امریکا سره رغنده اړیکې ولري، باید له ټولو نړیوالو اصولو سره سمه حکومتولي رامنځته کړي.
هغه په دې اړه وايي:« تاسې ولیدل، چې د امریکا په ګډون د نړۍ ګڼ شمېر هېوادونو ځینو شرایطو ته په کتو په اوږدمهاله کې او د واک لېږد پر مهال د یو شمېر هېوادونو له رسمیت پېژندنې ډډه کړې او هغه څه، چې موږ یې روښانه کولی شو دا دي، چې مخکې له دې چې امریکا په دې اړه ګام پورته کړي، د سوریې خلک دې دغه اصول تعقیب کړي.»
مېلر د امریکا له لوري په ځېنو هېوادونو کې د حکومت پر رسمیت نه پېژندلو سربېره له یادو هېوادونو او وسله والو ډلو سره سیاسي هوکړې او اړیکې ساتل د امریکا قوانینو خلاف نه دي بللي.
امریکا له اسلامي امارت سره له نږدې دوو کلونو مذاکراتو وروسته د سیاسي هوکړې له مخې په ۲۰۲۱ کال کې خپل ځواکونو له افغانستان بهر کړل.
کابل او واشنګټن لا هم د قطر په کوربتوب د يادې لاسليک شوې هوکړې د ځينو مواردو پر نقض تورنوي.
خو د سیاسي چارو کارپوهان وايي، امریکا له خپلو منافعو سره سم د سیمې په اړه خپله پاليسي تغيروي.
د سیاسي چارو کارپوه توریالی ځاځی وايي:« د امریکا پالیسي د هغه هېواد ولسمشر نه ټاکي، یوه خاصه کمېټه لري چې هغه یې ټاکي او د یوه ولسمشر په راتګ سره یې ډېر جزوي تغییرات په بهرنۍ پالیسي کې راځي، نور دا صلاحیت نه لري چې د امریکا ټولې بهرنۍ پالیسۍ ته بدلون ورکړي.»
د سیاسي چارو کارپوه عزیز معارج وايي:« امریکا او په ټوله کې غربي نړۍ زبرځواک هېوادونه د خپلو ګټو لپاره، د خپل ښکېلاک لپاره د نورو هېوادونو لپاره له هر ډول وسیلې کار او ابرازو کار اخلي، په ځانګړې توګه دې وختونو کې د اسلامي هېوادونو لپاره افراطي ډلې را پيدا کوي، جوړوي یې، روزي یې او دا مخته کوي او هغه هېواد پرې ړنګوي، بې ثباته کوي. دې بې ثباتۍ کې بیا د دوی لاسوهنو ته ښه زمینه برابرېږي.»
د امریکا په ګډون نړیوالې ټولنې د اسلامي امارت رسمېت پېژندلو لپاره د بشري حقونو رعایت ترڅنګ پر ټولګډونه حکومت ټينګار لري، هغه څه چې اسلامي امارت یې کورنۍ مساله ګڼي.
