حقوق پوهان: طالبانو او امریکا د دوحې هوکړې الزامیت له منځه وړی دی

حقوق پوه سبحان الله مصباح وايي: « د امریکا له خوا طالبانو سره د جګړې نوی اعلان په دې مانا ده چې د امریکا او طالبانو ترمنځ چې دوحه کې کوم تړون شوې وه، د لمنځه وړلو په مانا ده. نو هغه تړون چې شوی وه،د هغه اثار اوس دې په نقض سره د دواړو له خوا له منځه ځي او کوم توافق چې شوی وو، دواړو خواوو ته یې الزامیت نه شته.»

د امریکا اوطالبانو ترمنځ له هوکړې وروسته د طالبانو او افغان حکومت ترمنځ خبرې پیل شوې، چې دا دی نږدې یوکال یې په پوره کېدو دی، خو پایله د خبرو صفر ده او مخه ټوله جګړې ته اړول شوې ده.

تحلیل کوونکي وایي، طالبانو په ډېره جغرافیه واک ترلاسه کړی او حکومت سره یې فاصله نوره هم ډېره شوې ده.

دوی وايي، په داسې یوه وخت کې زیات باور نه کېږي چې د سولې خبرې اترې دې بېرته ژر پیل شي.

تحلیل کوونکی خلیل نادم وايي: « طالبان له لومړي سره د حکومت د تسلیمۍ او قدرت په فکر کې وو. هغوی ویل چې موږ امریکا مات کړي یو او اوس مو ورسره هوکړه لاسلیک کړې او حکومت باید دوی ته وسپارل شي.»

طالبانو هم ویلي، په هوکړه باندې امریکا عمل نه دی کړی او دوی اړ دي چې الزامیت ختم کړي.

د طالبانو ویاند ذبیح الله مجاهد وايي:«د قطر هوکړې مواد تر اوسه پورې نه دي عملي شوي او دا موږ په کراتو کراتو ویلي دي چې تر اوسه پورې عمل نه ده پرې شوی او هغه د دې لپاره لاسلیک شوی، چې عمل پرې وشي. که مقابل جهت پرې عمل ونه کړي، نو موږ اړ یو چې الزامیت یې له منځه یوسو.»

ټینګار دا ده چې د سولې خبرې دې بیا پیل شي او د جګړې اړخونه دې سم لاسي اوربند وکړي.

 اوس مهال په جګړه کې زیات قربانیان ولسي خلک دي او د جګړو له امله د خلکو شتمنۍ په اور وسوځېدې.