د افغان سولې موضوع د زبرځواکونو هېوادونو تر بحث لاندې ده.
امریکا، روسیه او چین دې پریکړې ته رسیدلي چې افغانستان د خپلې راتلونکې په اړه د پریکړې واک ولري.
له بلې خوا طالبانو له روسيې غوښتي چې له امریکا سره د توافقاتو ضمانت وکړي.
خو تحلیل دا دی چې د افغانستان د ستونزې حل دومره لوی نه دی څومره چې اوس پيچلی ښودل کیږي.
د افغانستان سولي موضوع اوس د نړۍ د قدرتمند مثلث، امریکا، روسیې او چین تر بحث لاندې ده.
دریو سره هېوادونو په ناسته کې د افغانستان پر ستونزو او د ښې راتلونکې په اړه د نظریاتو تبادله کړې چې د بحث یوه پریکړه یې په دې منتج شوې چې افغانستان به په راتلونکې کې د خپلې پریکړې واکداره وي.
د امریکا د بهرنیو چارو وزارت داسې ویلي ((په هره هوکړه کې باید د افغانانو په ځانګړې توګه د ښځو، لږکيو او ماشومانو حقوق پکې خوندي وي او ډاډ تر لاسه شي ،چې افغان خاوره به د نړيوالو ترهګرو ډلو يا افرادو لخوا د بل کوم هېواد پر وړاندې نه استعمالېږي. دواړو لورو د افغانستان په ملي حاکميت، خپلواکۍ او جغرافيه يې استقلاليت ته بشپړ در ناوی لري.))
طالبانو بیا له روسيې غوښتي چې له امریکا سره د کېدونکي توافقاتو ضمانت وکړي.
ضمیر کابلوف داسې ویلي ((طالبانو د پیاوړي او جدي نړیوال ضمانت غوښتنه کړې او موږ ورته په ځواب کې وویل چې وخت یې را ورسید نو خامخا به دغه کار کوو))
خو تحلیل دا دی چې د افغانستان د سولې موضوع اوس له ستونزمن پړاو څخه تېره شوې او په لوی لاس دغه مسله لویه ښودل کیږي تر څو افغانانو تر اغیز لاندې راولي.
د افغانستان د سولې عالي شورا هم وايي چې د افغانستان د جګړې په ختم کې اوس سیمه اییز او نړیوال فکر مثبت دی.
په کور دننه بیا حکومتي مشران او یو شمېر افغان سیاسیون د سولې موضوع اوس په بین الافغاني خبرو پورې تړي او روانې خبرې هغه وخت د بریا سټیج ته رسیدلی شي چې طالبان بین الافغاني خبرو ته کیني.
