د پاکستان د بهرنیو چارو وزارت له لورې په خپره شوې خبرپاڼه کې ویل شوي، دواړو خواوو د افغانستان له سرپرست حکومته غوښتي، چې خپل ولس او نړیوالې ټولنې سره پر کړو ژمنو ودريږي او ټولشموله حکومت دې جوړ کړي.
په خبرپاڼه کې دغه راز راغلي، په دې لیدنه کې دواړو لورو د افغانستان پر وروستي وضعیت خبرې کړې او بلاول بوټو زرداري د افغانستان د سولې او ثبات لپاره د پاکستان پر هڅو د روسیې د بهرنیو چارو وزیر ته مالومات ورکړي دي.
اسلامي امارت بیا د روسیې او پاکستان د وروستیو څرګندونو په تړاو څه نه دي ویلي، خو له دې وړاندې یې ویلي وو، چې حکومت یې ټولګډونه دی او د ټولو خواوو استازي پکې ګډون لري.
