توماس وېسټ له پاکستاني چارواکو سره د افغانستان په تړاو خبرې کړې

د افغانستان لپاره د امریکا ځانګړي استازي توماس وېسټ د پاکستان بهرنیو چارو وزارت له پلاوي سره په کتنه کې د افغانستان په تړاو په بېلابېلو موضوعاتو خبرې کړې دي.

د پاکستان بهرنیو چارو وزارت پر خپله ټویټرپاڼه لیکلي، وېسټ د یاد وزارت د مرستیال اسد محمد خان په مشرۍ پلاوي سره په اسلام اباد کې کتلي او دواړو خواوو په سیمه کې د سولې او ثبات لپاره پر ګډ کار ټینګار کړی دی.

تېره ورځ د امریکا بهرنیو چارو وزارت ویلي وو، چې د افغانستان لپاره به یې ځانګړی استازی د مشورو لپاره پاکستان جرمني او سویس ته سفر وکړي او د دغه هېوادونو له چارواکو سره به د افغانستان په تړاو خبرې وکړي.