د ملګرو ملتونو امنیت شورا سبا د افغانستان په تړاو غونډه کوي

د افغانستان په تړاو د ملګرو ملتونو امنیت شورا د دغې ناستې د جوړېدو غوښتنه متحده عربي اماراتو، جاپان او فرانسې کړې او ټاکل شوې، چې سبا جمعه «د سلواغې ۷مه» به ترسره شي.

په یاد سازمان کې د متحده عربي اماراتو د ماموریت ویاندې شهاد مطر ویلي، دغه غونډه به د امینې محمد په شتون کې جوړه شي.

په یاده ناسته کې به د ملګرو ملتونو د عمومي منشي مرستیاله امینه محمد افغانستان ته د خپلې تېرې اوونۍ سفر ارزونه وکړي او د افغانستان د وضعیت او د هغو پيامونو په تړاو به هم خبرې وکړي چې د اسلامي امارت چارواکو ته یې وړاندې کړي دي.

خو اسلامي امارت د دغه راز غونډو له جوړوونکو غواړي څو له سرپرست حکومت سره د همکارۍ لاره غوره کړي. 

تر دې وړاندې، د افغاسنتان لپاره د روسیې ځانګړي استازي ضمیر کابلوف ویلي وو، چې تمه ده په راتلونکو میاشتو کې د سیمې د هېوادونو په ګډون د افغانستان په تړاو غونډه جوړه شي.

کابلوف ویلي، په جوړېدونکې غونډه کې به د افغانستان لپاره د مرستو پر را ټولولو خبرې وشي.