ګريفيټس: افغانستان سره د نړیوالې ټولنې مرستې به دوامداره او غير مشروطې وي

په بشري چارو کې د ملګرو ملتونو د عمومي منشي مرستيال مارتين ګريفيټس د پوهنې وزارت له سرپرست مولوي حبیب الله آغا سره په کتنه کې ډاډ ورکړی، چې له افغانستان سره د نړیوالې ټولنې مرستې به دوامداره او غير مشروطې وي.

ګریفیټس ویلي، سیاسي تعاملات به هېڅکله بشري مرستې ټکنۍ نه کړي.

په دې کتنه کې د پوهنې وزارت سرپرست وزیر په افغانستان کې د نړيوالې ټولنې ښوونیز فعاليتونه ستایلي او ژمنه یې کړې، چې پوهنې وزارت به هڅه وکړي، تر څو نړیوالو خیریه بنسټونو ته د فعالیت ټولې اسانتیاوې برابرې او په دې برخه کې د یو همغږي کوونکي او اسانتیا رامنځته کوونکي جهت رول ولوبوي.

د یادونې وړ ده چې ګریفیټس تر دې وړاندې د اسلامي امارت له يو شمېر نورو لوړو پوړيو چارواکو سره هم کتلي وو.