د امریکا بهرنیو چارو وزارت د اسلامي امارت له لورې د ښځو او نجونو پر وړاندې وروستیو فرمانونو ته غبرګون ښودلی او ویلي یې دي،هر څه له نږدې څاري او اسلامي امارت به د دې فرمانونو له امله لویه بیه پرې کړي.
د یاد وزارت ویاند نیډ پرایس د یوه خبري کنفرانس پر مهال وویل، د افغانستان پر وړاندې راتلونکې پریکړې به له خپلو متحدینو سره په ګډه کوي.
پرایس زیاته کړې:« موږ له طالبانو سره خپل چلن او تعامل د دوی له خوا د بشري حقونو نقض او هغو فرمانونو پر بنسټ مخ ته وړو،چې په وروستیو اونیو او میاشتو کې خپاره شوي دي. زه اوس جزئیات نه شم ورکولی،خو دا درته ویلی شم،چې موږ خپل راتلونکې اقدامات له خپلو متحدینو سره په ګډه ارزوو.طالبان به لویه بیه پرې کړي.»
پرایس د اسلامي امارت لخوا په غیر دولتي موسسو کې د ښځو پر کار د بندیز په اړه هم د اندېښنې ترڅنګ ویلي، ۸۳ سلنه موسسو خپل کارونه ځنډولي یا یې هم کم کړي دي،ځکه له ښځینه کارکوونکو پرته فعالیت نه شي کولی.
دغه راز پرایس ویلي، دا چاره به د هغو ۲۸ میلیونه افغانانو ژوند لا سخت کړي،چې شپه یې پر بشري مرستو سبا کیږي.
پرایس زیاتوي:«د دې فرمانونو له امله اوس سړي نه شي کولی هغو کورنیو ته ورشي،چې مشري یې ښځې کوي. انجو ګانې اوس دغو اړمنو کورنیو ته بشري مرستې نه شي رسولی. دا موږ او نړیوالې ټولنې ته هېڅ د منلو وړ نه ده، ځکه د ۲۸ میلیونه افغانانو او په ځانګړې توګه د ماشومانو ژوند له ګواښ سره مخ کوي.»
د بهرنیو چارو وزارت ویاند د هغې پوښتنې په ځواب کې چې افغانستان سره مرستې به اسلامي امارت لا پیاوړي کړي وویل، مرستې یې له حکومت سره نه بلکې له افغانانو سره دي.
هغه زیاته کړې:« موږ له افغانستان سره د بشري مرستو رسولو په برخه کې تر ټولو ستر هېواد یو،چې د طالبانو له لاسرسي پرته افغانانو ته رسیږي. موږ د ۲۰۲۱ کال را وروسته له طالبانو سره نه بلکې له افغانانو سره د یو اعشاریه یو میلیارد ډالرو په ارزښت مرستې کړي دي. موږ هڅو کوو، تر څو د افغانستان روان بشري وضعیت لا پسې خراب نه شي.»
د امریکا بهرنیو چارو وزارت داسې مهال افغانستان کې د ښځو پر کار اندېښنه ښیي،چې اسلامي امارت له دې وړاندې دا ډول څرګندونې په خپلو کورنیو چارو کې لاسوهنه یادې کړې وه.
اسلامي امارت د نجونو ښونځیو او پوهنتونونو په اړه بیا استدلال کوي،چې تر بل امره ځنډیدلي او تر یوه مناسب میکانیزم وروسته به بېرته پرانېستل شي،هغه میکانیزم چې ښوونځیو ته په تېر یوه کال کې هم جوړ نه شو.
