د اسلامي امارت د رياست الوزرا اقتصادي مرستيال ملا عبدالغني برادر د چهار شنبې پر ورځ « ۱۴۰۱ کال د تلې پر ۲۸ مه» د کرنیزو محصولاتو ۲۷ تم نندراتون پرانېست غونډه کې د وینا پرمهال وویل،په تیر يوه کال کې د اسلامي امارت له کړو خدمتونو ولس راضی نه دی او دغه لاسته راوړنې د نمونې په توګه دي.
دغه راز ملا برادر د ستونزو د حل لپاره د مسووليت پر پیژندنلو او پر ځان بسیايني ټینګار وکړ.
ملا برادر زیاته کړه:« یو کال تېر شو، تر اوسه پورې موږ د دې ملت لپاره داسې څه نه دي کړي،چې ملت پرې قانع شي. ملت پر دې قانع نه دی. موږ تر اوسه پورې ملت ته داسې خدمت نه دی کړی، یوازې د نمونې په ډول مو کار کړی دی.»
ملا برادر د طبیعي زيرمو کېندنه او له هغو ګټه اخېستنه د اقتصادي ناروين د مخنيوي لپاره مهم عامل وګاڼه او له سوداګرو او بهرنيو شرکتونو يې وغوښتل،چې په دغه برخه کې پانګونه وکړي.
