امنیت شورا د افغانستان په اړه ناسته کوي 

افغانستان کې د ښځو حقونو په تړاو د نړیوالو پرله پسې اندیښنې د دې لامل شوي،چې د ملګرو ملتونو امنیت شورا دغه موضوع په خپلو سږنيو ازاد بحثونو ناسته کې وارزوي.

د ملګرو ملتونو امنیت شورا د ازادو بحثونو ناسته به نن پنجشنبه پیل شي،چې د ۹۲ هېوادونو او نړیوالو سازمانو استازي به په کې،چې شمیر یې له ۴۸۰ زیات دی، ګډون وکړي.

د بشري حقونو د څار نړیوال سازمان د ښځو برخې مرستیاله هېدر بار وايي، دغه بحثونه به تر ډېره د افغان ښځو پر وضیعت وشي او غوښتنه به دا وي،چې ملګري ملتونه د خپل صلاحیت پر بنسټ له بشري حقونو د سرغړونې په تور د اسلامي امارت پر مشرانو سفري او نور بندیزونه ولګوي.

بار زیاته کړه:« موږ به له ماموریتونو او د ملګرو ملتونو سازمان سره بحث وکړو،ترڅو ګامونه پورته کړي. دغو ګامونو کې به د ملګرو ملتونو له صلاحیتونو په استفادې پر طالبانو د بشري حقونو د سرغړونې په موخه سفري او نور بندیزونه هم شامل وي.»

هېدر بار وايي،دغه ناسته یو ښه فرصت دی،چې نړیوالو ته هغه چارې په ګوته شي،چې د افغانستان لپاره یې ترسره کولو ته اړتیا لیدل کیږي .

خو د ښځو چارو فعالانې بیا وايي،د زیاتو  ناستو جوړول کوم ځای نه نیسي او په دې برخه کې باید جدي اوعملي ګامونه پورته شي.

د ښځو حقونو فعاله مونسه مبارز وايي:« زما په باور له حد زیاتو ناستو دوام پایله نه ورکوي،د افغان ښځو د ژوند تغیر یو قاطع اوعملي اقدام ته اړتیا لري او هېله منه یم،چې جدي تصامیم ونیول شي.»

د سیاسي چارو شنونکي په دې باور دي،چې د افغانستان حکومت باید هغه نړیوال قوانین چې له اسلامي او افغاني ارزښتونو سره په ټکر کې نه دي، باید درناوی یې وکړي او نړیوال دې هم   د فشار پر ځای له افغان لوري سره د تعامل لاره غوره کړي.

د سیاسي چارو شنونکی هاتف مختار وايي:« افغانان هم له اسلامي امارته غواړي،چې د نجونو ښوونځي خلاص کړي او هغو نړیوالو قوانینو ته په درنه وګوري،چې له اسلامي ارزښتونو سره په ټکر کې نه دي  له بل پلوه ملګرو ملتونو ته هم پکار ده،چې د فشار پر ځای له افغان حکومت سره د تعامل لاره خپله کړي.»

څو ورځې وړاندې د اسلامي امارت ویاند ذبیح الله مجاهد په ترکیه کې د دیني عالماوو ناستې ته په ‍وینا کې وویل،له شپږم ټولګي پورته د  نجونو ښوونځي پرانېستل کیږي،خو اوس یې د نصاب په سمون، ښوونځیو ته د تګ راتګ او همداراز یو معیاري ښوونیز سیسټم پر رامنځ ته کولو بوخت دي .

د اسلامي امارت دریځ بیا دادی،چې د ښځو ټولو اسلامي حقوقو ته ژمن دي او هغه څه چې اسلام ښځو ته  ورکړي،هېڅ څوک یې ترې نه شي اخېستلی.

دغې ناستې ته به د ملګرو ملتونو د سرمنشي مرستیاله امنیه محمد، د ښځو چارو اجرائیوي مشره یې او د بشري حقونو څار نړیوال سازمان د ښځو برخې مرستیاله هېدربار ویناوې وکړي.

د ښځو حقونو ته نه پاملرنه، د نجونو د ښوونځیو پیل ځنډ او د کار حق یې هغه څه دي،چې ظاهرآ یې نړیوال د افغانستان د اوسني نظام پر رسمیت نه پیژندنې اصلي لامونو په توګه وړاندې کوي.