Skip to content
د امریکامتحده ایالتو په ۴۸ پاڼو کې خپله نوې امنیتي تګلاره خپره کړې.
د یاد هېواد ولسمشر جو بایډن ویلي، دغې سټراټيژۍ د ترهګرۍ پر وړاندې د مبارزې په برخه کې ډېر تمرکز پر افغانستان کړی دی.
بایډن له اسامه بن لادن وروسته د القاعده ډلې د بل مشر ایمن الظواهري وژلو ته په اشارې ویلي، افغانستان کې یې شل کلنه جګړه پای ته رسیدلې،خو پر ترهګریزو ډلو یې د هوا له لارې څار نه دی ختم شوی.
بایډن زیاته کړې:« موږ د افغانستان اوږده جګړه پای ته رسولې، د عدالت په پلي کولو سره مو کلونه مخکې خپلې موخې هم ترلاسه کړي او اسامه بن لادن مو له منځه وړی دی. موږ په دې وروستیو کې ایمن الظواهري هم پر نښه کړ. موږ د دې وړتیا لرو،چې اوس هم د القاعده او داعش په څېر ډلې د فضاء له لارې پر نښه کړو.موږ به افغانستان پرینږدو،چې د ترهګرو پر پټن ځای بدل شي. طالبان هم باید د ترهګرۍ پر وړاندې د مبارزې برخه کې د ژمنو نه عملي کولو ځواب ورکړي.»
بایډن زیاته کړې،دا توان لري،چې دوی او متحدینو ته یې پیښیدوونکی ګواښ دفع کړي او له لرې یې مخنیوی وکړي.
اخوا د پوځي چارو شنوونکي بیا د بایډن دغه څرګندونې له پوځي حضور پرته سیمه کې د امریکا د ځواک نمایش بولي.
د پوځي چارو شنونکی توریالی ځاځی وايي:« د بایډن دغه بې شرمانه وینا، یوازې او یوازې د دې لپاره ده،چې دی وکولی شي،خپل شتون په سمیه او زموږ هېواد کې ښکاره کړي، دا خبره یې کړې، چې موږ کولی شو،چې په هر ځای کې ترهګرې ډلې وي، پر نښه یې کړو او له منځه یې یوسو.»
ځینې نور بیا وايي، د امریکا ډرون بریدونه او د فضاء له لارې د افغانستان کنټرول د اسلامي امارت د خپلواکۍ ادعا هم له پوښتنې سره مخ کړې او پر وینا یې د فضايي حریم د نقض په مانا هم ګڼل کیږي.
دغه راز دوی وايي، که دغه ډول هوايي بریدونه او عملیات دوام وکړي،سیمې ته به هم د بې ثباتۍ اندیښنې پیدا کړي.
د پوځي چارو شنونکی صادق شینواری وايي:« که چېرې د امریکا بې پیلوټه الوتکو عملیات د افغانستان پر فضايي حریم دوام وکړي،یو ګواښ دی او د افغانستان موجوده نظام مشروعیت او استقلالیت تر پوښتنو لاندې راولي.»
اسلامي امارت تازه د بایډن نوې سټراټيژۍ ته کوم غبرګون نه دی ښودلی،خو تر دې وړاندې یې د دغو بریدونو په بدل کی واشنګټن ته د بدو پایلو خبرداری ورکړی دی.
