Skip to content
په خواله رسنیو کې داسې ویډیوګانې لاس په لاس کېږي،چې د کندهار ناوې بند سیمه کې له ډله ییز قبره د انسانانو د بدن برخې راېستل کېږي.
د دې ویډیوګانو له خپرېدو وروسته د افغانستان لپاره د ملګرو ملتونو ځانګړي راپور ورکوونکي ریچارډ بېنېټ د یاد ډله ییز قبر په اړه د هر اړخیزې څېړنې غوښتنه کړې.
هغه زیاته کړې:« کورنیو اړتیاوو ته باید حساس شو، مهمه ده،چې د مړو دا پاتې شونې له دې زیات خراب نه شي او عدلي طب په دې تړاو خپلې پلټنې او څېړنې وکړي.»
د دې ترڅنګ د بشري حقونو څار سازمان د اسیا برخې مرستیالې پتریشیا ګاسمن بیا پر خپله ټویټرپاڼه لیکلي،د ډله ییز قبر پاتي شوي باید وساتل شي، ترڅو له څېړنې وروسته مالومه شي، چې دا وژنې چا، کله او ولې کړي؟
ګاسمن زیاته کړې:«ډاډ باید ترلاسه شي،چې دا پېښه بیا د غچ اخیستلو په موخه د وژنو لامل نه شي، مسوولین باید له ملګرو ملتونو او نورو ادارو سره همکاري وکړي، تر څو یقیني شي، چې ساحه ډاډمنه ده، او مالومه شي، چې څه پېښ شوي؟ وژل شوي څوک دي؟ د خپلوانو او کورنیو اندېښنو ته باید پوره درناوی وشي.»
د اسلامي امارت مرستیال ویاند بلال کریمي بیا وايي، د دوی لومړنیو مالوماتو له مخې،دغه قبرونه کلونه وړاندې کیندل شوي او ښايي د تېر ادارې له لورې دا کار شوی وي.
کریمي زیاتوي:« فکر کوم، د سپین بلدک ولسوالۍ کې خلکو د اوبو یو بند جوړوه،چې هلته یو قبر موندل شوی دی،چې جسدونه په کې ول. دا پېښه دلته شااوخوا ۸ یا ۹ کاله وړاندې رامنځته شوې، د تېرې ادارې تر حاکمیت لاندې دا پېښه رامنځته شوې. هلته اوس څېړنې روانې دي او وروسته به جوته شي،چې دا وحشت چا کړی؟ څنګه شوی؟ او چا کړی؟»
وړاندې هم کندهار کې هم د وژنو راپورونه ورکول شوي ول،خو دا لومړی ځل دی،چې په دوو جلا سیمو کې ډله ییز قبرونه موندل کیږي.
