کابل کې چاودنې پر کوردننه او بهر سخت غبرګونونه پارولي 

کابل  کې د وزیر اکبر خان جومات مخې ته پروني موټر بم برید د مرګ ژوبلې شمېر ۴۸ تنو ته رسېدلی دی. 

د کابل امنیه قومندانۍ ویاند خالد ځدراڼ وايي،د پېښې ټول قربانیان ملکیان دي او د ماشومانو په ګډون اووه کسانو ژوند بایللی او ۴۱ نور ټپيان دي.

له اسلامي امارت پرته هم پر کور دننه او بهر دا بريد په سختو ټکو غندل شوی دی. 

د هېواد پخواني ولسمشر حامد کرزي او کابل کې د امریکا سفارت په یو ټویټ کې دا برید نه بښونکی جنایت بللی دی.

کابل کې د امریکا سفارت پر خپله ټویټرپاڼه لیکلي:«  د امریکا متحده ایالات په کابل کې د وزیر اکبر خان جومات بهر پر لمونځ کوونکو وحشیانه برید پر ککله غندي او دا ډول بریدونه د توجیح وړ نه دي. موږ د قربانیانو له کورنیو سره خواخوږي څرګندوو او ټپیانو ته د ژر تر ژره روغتیا هېله کوو.»  

افغانستان کې د ملګرو متلونو  سیاسي استازولي ( يوناما) هم دغه برید ته په اشارې  ويلي،چې دا برید د يوې بلې ترهګریزې ډلې د فعالیت يادونه ده،چې ملکيانو ته په کې مرګ ژوبله اوښتې. 

یوناما زیاته کړې:« په افغانستان کې د روانې ناامنۍ او ترهګریزو فعالیتونو  یوه بله یادونه، کابل کې د یوه جومات مخې ته چاودنې د زیانونو تر څنګ درنه مرګ ژوبله اړولې. موږ د وژل شویو کسانو له  کورنیو سره خواخوږي شریک کوو او ټپیانو ته د عاجلې روغتیا هېله کوو.» 

د اسلامي امارت امنیتي مسولین وايي، د برید په تړاو یې څېړنې پیل کړي او ژر به یې عاملین پیدا او مجازات کړي. 

د جمعې ورځې خونړي برید مسوولیت که څه هم تر اوسه پورې کومې وسله‌ والې ډلې نه دی منلی،خو پر جوماتونو او عبادت کوونکو بریدونو عام افغانان اندېښمن کړي دي.