Skip to content
په کندهار و لایت کې د بې پولو ډاکټرانو ټولنې د روغتيایي برخې مرستیال ډاکټر مجيب احمد وایي، په دغه ولایت کې ۸۰۶ کسان، چې پر نري رنځ ناروغۍ اخته وو،دوی ته یې مراجعه کړې، چې په کې زندانيان، مېرمني او ماشومان هم شامل وو.
احمد وایي،دوی توانېدلي،چې د ټي بي پر سخته بڼه د اخته ګڼو ناروغانو درملنه وکړي، خو په خبره يې د درملني په جريان او له درملني وروسته ۲۳ نارغانو خپل ژوند د همدې ناروغۍ له امله لاسه ورکړی دی.
د احمد په خبره، د تېر کال په پرتله کندهار کې د نري رنځ ناروغي ۴۰ سلنه زياته شوې، چې لامل يې روغتيایي مرکزونو ته د خلکو نه رسېدنه ده.
احمد زیاته کړه:« د ۲۰۲۰زېږدیز کال د ډسمبر تر اخره موږ ۴۶ ناروغان تشخیص کړي وو، خو د تېر ۲۰۲۱ کال تر اخره مو ۷۶ د نري رنځ ناروغان تشخیص کړي وو، چې دا نژدې ۴۰ سلنه زیاتوالی ښيي. همدا ډول په میرویس حوزوي روغتون او ملکي روغتون کې ۸۰۶ نارروغان ټوټل تشخیص شوي دي.
په کندهار کې د بې پولې ډاکټرانو ټولني غړي وایي، نارغانو ته د درملو ترڅنګ خواړه، د اوسېدو ځای او د تګ راتګ لګښت هم ورکوي.
په کندهار کې د بې پولې ډاګټرانو د نرسېنګ برخې مشره انتونيا موګاني وايي:« د اوس مهال لپاره د ناروغانو درملنه دلته ډېره مهمه ده،ځکه د هغوی درملنه له يوې مياشتي نيولې،تر نهو مياشتو موده کي ترسره کیږي.
هغوی ته دلته د درملنی ترڅنګ خواړه، درمل او د تګ راتګ لګښت هم ورکول کیږي.»
په نري رنځ اخته هغه ناروغان،چې د کندهار د بې پولو ډاکټرانو په مرکز کې يې درملنه روانه ده وایي،د روغتيايي سپارښتونو د نه مراعت له امله پر دغې ناروغۍ اخته شوي، خو هغوی له نورو خلکو غواړي،چې په نري رنځ د اخته کېدو پر مهال هر څه ژر روغتيایي مرکزونو ته مراجعه وکړي.
پر نري رنځ ناروغۍ اخته یوه ناروغه وايي:« اول کې مې دغه بغلونو درد کاوه، لاسونو مې درد کاوه، بیا دلته راغلم بستر شوم، دوا یې راکړه،ډېره ښه شوم، جوړه شوم، خو اوس یوازې سر درد او تبه پاتې دې، چې دا به هم ښه شي.»
د بې پوليو ډاکټرانوټولنه د کندهار تر څنګ په هلمند، کابل، هرات، کندز او خوست ولایتونو کې فعالیت کوي،چې په کندهار کې یې ډېر تمرکز د نري رنځ د ناروغانو پر درملنه او د دغې ناروغۍ پر مخنیوي دی.
