Skip to content
د نړیوال بانک له خوا د افغانستان اقتصادي وضیعت په تړاو د ترسره شوې سروې پایلې ښیي،چې دې هېواد کې اقتصادي فعالیتونه د پام وړ کم شوي او خصوصي سکتور تر بل هرڅه ډېر زیان لیدلی دی.
په سروې کې له درېیو پوښتل شویو سوداګرو یو یې ویلي، د تېر کال اګست میاشتې راوروسته یې فعالیتونه درولي او هغوی چې لا هم ادامه ورکړې وایي، بازار کې تقاضا کمه شوي او اړ دي، له نوي حقیقت سره فعالیتونه برابر کړي.
د سروې پایلې ښیي،چې په دې موده کې ۳۸ سلنه کوچني شرکتونه، ۲۵ سلنه منځني شرکتونه او ۳۵ سلنه لوی شرکتونه د لنډ مهال لپاره تړل شوي دي.
نړیوال بانک:« د ښځو تر رهبری لاندې شرکتونو له ډلې، ۴۲ سلنه د لنډ مهال لپاره تړل شوي دي. ۸۲ سلنه هغو شرکتونو،چې په سروې کې یې ونډه اخیستې ویلي، بازار کې تقاضاء کمه ده او له امله یې د دوی فعالیتونه ټکني شوي دي. د کرنیزو محصولاتو سوداګرۍ په دې موده کې یا نه دي ځپل شوي یا هم لږ تر اغیز لاندې راغلي دي.»
په سروې کې د کورنیو تولیداتو په اړه ویل شوي دي،چې بیې یې د خامو موادو کمښت له امله پورته تللي او بهرنیو توکو ته هم د پولو تړل کېدو له امله لاسرسی سخت شوی دی.
د نړیوال بانک موندنې ښیي،چې شرکتونو تر نیمایي زیات کارکوونکي له دندو اېستلي،چې په ډله کې یې ښځې تر سړیو ډېرې زیانمنې شوي دي.
سروې ښیي،چې د خصوصي سکتور ۷۵ سنله ښځینه کارکوونکې له دندو اېستل شوي دي.
د نړېوال بانک:« د بانکونو فعالیتونو ټکني کېدو له امله پر نغدو پیسو او د پیسو پر غیر قانوني لیږد تکیه ډېره شوې ده. پر کوردننه د پیسو لیږد بهیر ټکنی شوی دی،چې له امله یې بانکونه د نغدو پیسو له کمښت سره مخ شوي دي. د سروې ډېریو نارینه وو ګډونوالو ویلي،چې امنیت ښه شوی،خو ډېریو ښځینه ګډونوالو بیا ویلي چې امنیت خراب شوی دی.»
نړیوال بانک وایي،د افغانستان ډېری شرکتونه اوس د هېواد راتلونکې وضیعت ته په تمه دي، تر څو پر بنسټ یې د خپل کاروبار برخلیک وټاکي،په داسې حال کې،چې ځینې نور بیا اړ شوي، په چورلټ ډول له مارکیټه بهر شي.
