په امریکا کې د افغانانو د لنډمهالي خوندیتوب لغو کولو پرېکړې د دې هېواد پخوانیو سرتېرو او د بشري حقونو فعالانو سخت غبرګونونه را پارولي دي.
د دوی په ټکو، د امريکا دا پرېکړه احمقانه ده او خبرداری یې ورکړی چې د تطبيق پرمهال به يې له فزیکي مقاومت سره مخ شي. د امريکا کورني امنیت وزیرې کریسټي نوم روانه میاشت اعلان وکړ چې په دې هېواد کې د ۱۰ زرو افغانانو د لنډمهاله خوندیتوب(ټي.پي.اېس) پروګرام لغو کوي.
اندريو سالېوان چې د امریکا په پوځ کې د پلي ځواکونو پخوانی قومندان دی، دا پرېکړه د هغو کسانو پر وړاندې سپکاوی ګڼي چې له امريکا سره يې همکاري کړې.
د امریکا پلي ځواکونو يو پخوانی قومندان اندريو سالېوان زیاته کړې: « سره له دې چې په افغانستان کې ګواښونه لا هم شته، دا لس زره کسان چې لا هم د دايمي اقامت ترلاسه کولو په تمه دي، ښايي له امریکا و ایستل شي. زه چې یو پخوانۍ پوځي یم، دغه پرېکړه یو سپکاوی راته ښکاري. که کوم هېواد د لنډ مهالې مېشتېدنې پروګرام مستحق وي هغه به افغانستان وي.»
له دې سره په یوه وخت، د مریکا سمندري ځواکونو يو بل پخواني سرتېري سي بي اېس نيوز ته په خبرو ادعا کړې چې د امریکايي ځواکونو افغان همکاران اوس په افغانستان کې له ګواښ سره مخ دي او ملاتړ ته اړتيا لري.
د امریکا سمندري ځواکونو دغه پخواني سرتېري جک مک کین ویلي: « زموږ ولس د هغو ټولو پوروړی دی چې په تېرو کلونو کې یې په افغانستان کې د امریکایانو ترڅنګ جګړه کړې او هغوی باید امریکا ته ولېږدول شي. زه د ټرمپ حکومت له هغې طرحې سره مخالف يم چې له مخې به یې د افغانستان وګړي له امریکا وشړل شي او دغه راز ویلی شم چې له افغانستانه د امریکايي ځواکونو وتل پلان شوی عمل نه و بلکې ډېر ګډوډ و.»
خو ځينې هغه کسان چې امريکا ته د تګ لپاره په درېيمو هېوادونو کې په تمه دي، له بې برخليکه وضعيت او پر وړاندې يې د امريکا له بې تفاوتۍ شکايت کوي.
امریکا ته د تګ په تمه ناسته طیبه رستاقي وايي: « افغان کډوالو په دویمو هېوادونو کې د انتقال لپاره له ډېرو ستونزو سره مخ دي. په ځانګړې توګه پاکستان کې، سختګیران قوانین او اجبار، د اسلام آباد او راولپنډۍ ښارونو پرېښودل او د وېزې محدودیونو دغه شرایط نو هم سخت کړي. په دې منځ کې د انتقال ټکنۍ پروسې او د امریکا له خوا د ځینو دوسیو ځنډېدلو هم دغه اندېښنې زیاتې کړې دي.»
ملګرو ملتونو ويلي، شاوخوا ۱۱۰ زره کډوال او پناه غوښتوونکي دا مهال په پاکستان کې مېشت دي او ډېری هغه يې په خپل هېواد کې له ګواښونو سره مخ دي. د کډوالو دې وضعيت ته په کتو، د کډوالو حقونو مدافعان له امریکا غواړي چې د افغان کډوالو ستونزو ته رسېدنه وکړي او ژر تر ژره دې يې له درېيمو هېوادونو وباسي.
د کډوالو د حقونو مدافع علي رضا کریمي وايي: « د امریکا ولسمشر ډونالډ ټرمپ هم ورته څرګندونې کړې او ویلي یې دي چې امریکا نه شي کولی هغه کسان په سختو شرایطو کې پرېږدي چې له امریکا سره یې همکاري کړې.»
دا په داسې حال کې ده چې تېره اوونۍ د امریکا بهرنیو چارو وزیر مارکو روبیو کانګرېس ته وویل چې د افغان کډوالو د لېږد بهیر لغو شوی نه دی او لا هم تر ارزونې لاندې دی.
