د هلمند فاطمه بیات روغتون کې له ترکيې راغلي یوه افغان ډاکتر عبدالغفار غیور د پرې شونډو یا لب چاک او پرې تالوګانو یا کام چاک پر نارروغۍ د اخته کسانو وړیا عملیاتولو په موخه هلمند ته راغلی او د يادو شاوخوا ٢٠٠ ناروغانو عملیات يې کړي.
دا هلمند ته د نوموړي ډاکټر پنځم راتګ دی چې په ټولیز ټول یې تر ا وسه پورې د هلمند عامي روغتیا ریاست په همکارۍ ٩٥٠ عملیات ترسره کړي دي.
د ده په خبره، د عامو افغانانو غربت او ملي احساس له امله هڅېدلی چې خپلو خلکو ته هم د طبابت په برخه کې خدمت وکړي.
ډاکټر عبدالغفار غیور وايي: « دا پنځم ځل دی چې زه هلمند ته راځم او د لب چاک او کام چاک ناروغانو عملیات کوم. د هلمند ولایت صحت عامه او د دوی اړوند روغتونونه د ناروغانو لېستونه جوړوي او بیا ماته احوال راکوي چې دومره ناروغان دي او په همدې حساب کوم درمل او توکي چې دلته پيدا کېږي، همدلته یې برابروو او څه چې اړتیا وي، زه یې له ترکیې راوړم. دا ځل مو په بیات روغتون کې تر ۲۰۰ عملیاتونه ترسره کړل چې ښه په کامیابۍ سره مخکې لاړل.»
د هلمند عامې روغتیا ریاست مسوولین وایي، د درملو، عملیات خونو، نرسانو او ډاکترانو ترڅنګ یې نوموړي ته ټول اړین امکانات چمتو کړي دي .
د نوموړي همکار ډاکټران د غيور په وسيله ترسره کړي عمليات ښه تجربه ګڼي او ډاډ ورکوي چې په راتلونکي کې يې د خلکو درملنې لپاره وکاروي.
د هلمند عامې روغتیا ریاست مرستیال نقیبالله فاتح وايي: « ډاکټر عبدالغفار غیور له ترکیې دلته راځي او دایې پنځم ځل دی چې په دغو ټولو دورو کې یې ټولټال ۹۵۰ تنو عملیات ترسره کړي. په دې پنځم ځل یې هم د ۲۰۰ تنو لب چاک او تالو ناروغانو عملیاتونه ترسره کړل.»
یو شمېر ناروغ لرونکي بیا خوښ دي چې لپاره یې د وړیا درملني زمینه برابره شوې او وایي، په خصوصې روغتونونو کې پر دې ډول عملیاتو تر٨٠ زرو افغانیو لګښت کېده چې دوی يې د ورکولو وس نه درلود.
د هلمند یو تن اوسېدونکی وايي: « ما دا خپل زوی روغتون ته یوړ او دوه ځله مې عملیات ور وکړل، یوځل د شونډو او بل ځل د تالو، خو دواړه ځله ناکام شول. بیا ځل مې کابل ته یوړ، هلته یې هوتکي شفاخانه کې د شونډ او تالو عملیات وکړل، خو دا هم ناکام شول. موږ د دې ډاکټر راتګ ته خوشاله یو، ځکه ډېر کامیاب عملیاتونه کوي.»
د هلمند یو بل اوسېدونکی وايي: « دا زموږ د ماشوم تالو سوری لري، کله چې خواړه وخوري، بېرته یې پوزې ته راشي. که دا خدمت دلته په کور کې وشي، موږ به بل هېواد ته له تګ خلاص شو.»
هلمند د افغانستان پر کچه د لوی مساحت او پراخ نفوس لرونکی ولایت دی. خلک یې روغتيايي خدمتونو ته د محدود لاسرسي له امله شکايت کوي او غوښتنه کوي چې سرپرست حکومت دې ياد خدمتونه ورته زيات او پراخ کړي.
