د کرنې، اوبو لګولو او مالدارۍ وزارت مرستیال له شمشاد سره مرکه کې ویلي، هڅه کوي د بېلابېلو پلانونو پر بنسټ، کرنه میکانېزه، د وچکالۍ پر وړاندې مقاومت لوړ، د ځنګلونو د وهلو مخنيوي، د اوبو زېرمې غني او په هېواد کې د وچکالۍ د زیات اغېزو مخنیوي وکړي.
مولوي صدراعظم عثماني وايي، روان کال کې د هېواد پر کچه له کرنېزو کښتونو ۶ میلیونه ټنه غنم حاصل شوي چې په بازارنو کې د اړتيا وړ يو اندازه برخه پوره کوي.
د عثماني په خبره، افغانستان په کال کې ۷ میلیونه ټنه غنمو ته اړتیا لري او تمه ښي چې هېواد به په نږدې راتلونکې کلونو کې ځان بسياینې ته ورسيږي.
عثماني په دې اړه وايي:« د ټول افغانستان مصرف چې دی، څه کم ۷ میلیونه مټریک ټنه دی. کله چې موږ راغلو، تولیدات مو ۳ میلیونه مټریک ټنه وو. الحمد الله اوس درې نیمو کلونو کې تولید مو ۵ میلیونو مټریک ټنو ته رسیدلی دی. موږ په دې کال کې امید لرو چې تولید مو ۵.۵ میلیونو یا ۶ میلیونو مټریک ټنو ته ورسېږي. نو زه تاسو ډاډ درکوم چې په دوه یا درې کلونو کې به ځابسیاینې ته ورسېږو.»
د کرنې او مالدارۍ وزارت مرستیال وايي، د نشه یي توکو پر کښت، تولید او قاچاق له بندیز وروسته، د بدیل کښت برابرول د افغان بزګرانو اساسي غوښتنه ده.
صدر اعظم عثماني له نړيوالې ټولنې غواړي چې د بدیل میعیشت چمتو کولو په برخه کې له بزګرانو سره همکارۍ وکړي.
په ورته وخت کې عثماني وايي، هڅه کوي چې افغانستان د کرنې په برخه کې ځان بسیاینې ته ورسوي او پر صادراتي هېواد يې بدل کړي.
دغه راز عثماني د کرنۍ وزارت لپاره د تېر کال ورکړل شوې بوديجه کافي نه بولي او د روان کال لپاره يې د زياتوالې غوښتنه کوي.
هغه زیاته کړې:« زموږ اړتیا خو ډېره ده، ځکه مرکز او ۳۴ ولایتونه دي، په ولایتونو کې بیا د ځمکې، کرنې او مالدارۍ ستونزې دي. زموږ وزارت هم خدماتي دی، د خلکو ستونزې ډېرې دي، موږ زیاتې بودیجې ته اړتیا لرو. خو چې څومره بودیجه راکړل شي، قناعت به پرې کوو.»
د کرنې، اوبو لګولو او مالدارۍ وزارت مرستیال وايي، د وچکالۍ د مخنیوي په موخه دغه وزارت هڅې کوي چې اوبه په سمه توګه مدیریت کړي او په همدې موخه یې د اوبو او انرژۍ وزارت سره په ګډې همغږۍ په تېرو درېیو نیمو کلونو کې ۴۲۰ لوی او واړه چکډومونه جوړ کړې دي.
