د هند تر ولکې لاندې کشمیر کې پر سیلانیانو له بريد وروسته نوي ډيلي د یاد برید غچ اخیستلو او وسله والو ډلو د ځپلو په موخه د پاکستان پر کوټلي، بهاولپوراو مظفر اباد او د لاهور ښار پر يو شمېر سيمو بريدونه وکړه.
دې بریدونو په ټول پاکستان کې نه یوازې امنیتي ادارې ولړزولې بلکې درېیمو هیوادونو ته د تګ او ژوند په موخه په دغه هېواد کې مېشت زرګونه افغانان یې هم انديښمن کړ.
یاد افغان کډوال وایې، د پاکستان له لوري افغان کډوالو د ایستلو ضرب الاجل او له بل پلوه هلته وروستي امنیتي کړکیچ له ستونزو سره مخ کړي.
پاکستان کې مېشت افغان کډوال نظر خوږیاڼیوال وايي:« پاکستان کې چې څومره افغان کډوال دي، ټول اندېښمن دي. له وېرې سره مخامخ دي، په دومره لنډ وخت کې افغانان خپل کاروبار نه شي راټولی. افغانانو باندې نورو سیمو کې پابندي ده، یوازې په دوو سیمو خیبرپښتونخوا او لاهور کې ازاد دي.»
د اسلام اباد او ډيلي ترمنځ همدې د نا امنیو ایجاد ته په کتو پرون پاکستان کې د امریکا سفارت امریکایي وګړو ته خبرداری ورکړی وه ،چې د هند او پاکستان د پولې او د کنټرول کرښې شاوخوا سیمو ته سفر ونهکړي.
خو د افغان وګړو د خوندیتابه او دوی ته د امکاناتو د برابریدو په هکله اسلام اباد کې افغان سفارت او کډوالو او بېرته راستنېدونکو چارو وزارت زموږ پوښتنې ځواب نه کړې.
خو د اسلام اباد په شمول د پاکستان په یو شمیر ښارونو کې ډېری افغان کډوال چې درېیمو هیوادونو ته د تګ په موخه هلته شپې سبا کوي وايي، له یوې لورې ورسره اړوند هېوادونو له لورې شوې ژمنې نه دې عملي شوي او له بل لوري پاکستان کې د ویزو نه تعدیل او له یاد هېواده د افغانانو شړلو له نامالوم برخلیک سره مخ کړي دي.
د کډوالو حقونو فعال احمد افغان وايي:« افغان مهاجرین چې د پي ون او پي ټو کیسونه لري، پاکستان کې په ډېرې ناامیدۍ سره شپې او ورځې تېروي. د افغان مهاجرینو وېزې چې موده یې پوره شوې، بار بار یې د وېزو تمدید لپاره اپلای کړی، خو له بده مرغه د پاکستان له خوا ورته نارمل وېزې نه ورکول کېږي او د ایستل کېدو سره مخ دي، په دې کې هغه افغانان هم شته دي که چېرې افغانستان ته وشړل شي نو خطرونه ورته متوجې دي. نو په دې توګه افغان مهاجرین په ټوله کې ناامیدۍ او بد اقتصادي وضعیت کې ډېر له روحي او روان فشار لاندې ژوند کوي.»
د سیاسي چارو شنونکي وایې، د هند او پاکستان ترمنځ ترینګلي وضعیت ته په کتو دې اړوند هېوادونه بهر ته تلوونکو افغانانو ته د ویزو ورکولو لړۍ چټکه او سرپرست حکومت دې د افغان کډوالو د خوندیتوب لپاره عملي اقدمات ترسره کړي.
د سیاسي چارو شنونکی امیر ګران وايي:« هغه هېوادونو چې دوی( افغانانو) ته وېزې ورکوي، هغوی دې دا پروسه چټکه کړې او افغانانو ته دې وېزې ورکړي ترڅو له دې ستونزمن حالته ووځي.»
دا په داسې حال کې ده چې دا مهال په پاکستان کې شاوخوا ۳ ميليونه افغان کډوال ميشت دي او له دغه هېواده د جبري ایستل کېدو له ګواښ سره مخ دي.
که څه هم سرپرست حکومت او نړيوالو سازمانونو له پاکستانه د افغان کډوالو د جبري ایستلو لړۍ د درېدو غوښتنه کړې خو تراوسه پورې اسلام اباد د کډوالو په اړه پر خپلې نوې پالیسۍ غور نه دی کړی.
