کریمي زیاتوي:« کابینه کې بدلون په دې مانا نه ده، چې دا کابینه به بدلېږي، نورکسان به راځي. دا په دې مانا، چې سرپرسته کابینه به قوي کېږي، پاتې ادارو ته به هغه کسان راځي، چې هېوادنیو ګټو، اسلامي ارزښتونو او ملي روحیه ولري.»
اخوا نړیوال هم پر سرپرسته کابینه ملاحظات لري او په ټولشموله حکومت ټینګار لري.
حکومت کې د ښځو ونډه بیا هغه غوښتنه ده، چې د طالبانو حکومت یې د نړیوالو خولې ته ورکړی او د مشروعیت لپاره یې طالبانو ته شرطونه ایښي دي.
شنونکی قریب الرحمن شهاب وايي:« راتلونکي نوي بدلونونه به زما په نظر ښایي ژور نه وي، خو ښایي ځینو مېرمنو ته سمبولیکه ونډه ورکړل شي او یا هم ځینې تخنیکي کسان په دویمو بستونو کې وګومارل شي، یو خو به وښيي، چې کابینه همه شموله ده او بل به نړیوالو او سیمې ته دا وښي، چې د دوی په اړه بیا فکر وکړي او حکومت یې پر رسمیت وپېژني.»
تر اوسه پورې د طالبانو او نړیوالې ټولنې ترمنځ د ټول ګډونه حکومت یو ګډ تعریف نه دی رامنځ ته شوی.
شنونکي وایي، د ښې حکومتولۍ په برخه کې لاهم نړیوال پر طالبانو زیات باوري نه دي.
شنونکی شفیق همدرد وايي:« زما په نظر نړۍ، چې کومې غوښتنې د افغانستان له نوې واکمنۍ لري، حکومت رامنځ ته کول دي، د زده کړو او کار زمینې برابرول او دې ته اجازه ورکول دي، د لږکیو حقوق پر رسمیت پېژندل دي، ترهګرۍ سره د یوې روښانه مبارزې پالسي څرګندول او په دې اړه نړۍ باوري شوې نه ده.»
اسلامي امارت وایي، کابینه به تر بشپړېدو او قوي کېدو سرپرسته وي او هڅې کوي، د پاتې ادارو لپاره وړ کسان وګوماري.
اسلامي امارت د خپل سرپرست حکومت لپاره وخت نه ده ټاکلی، خو داسې ښکاري، چې که حکومت کې نورو سیاستوالو او ګوندونو ته واک ور نه کړل شي، نړیوال به ژر اسلامي امارت پر رسمیت ونه پېژني.
