د منځنۍ آسيا له هېوادونو سره د سوداګرۍ پراخولو هڅو په لړ کې، د صنعت او سوداګرۍ وزارت پلاوی تاشکند ته رسېدلی او هلته به د ازبېکستان له چارواکو سره د سوداګرۍ په برخه کې پر متقابلو همکاريو وغږېږي.
د دې وزارت مسوولان وايي، ياد پلاوی به په تاشکند کې د ازبېکستان له چارواکو سره د سوداګرۍ پر لا اسانولو او د ګډو اقتصادي همکاريو پر زياتولو خبرې وکړي.
د مسوولانو په خبره، د صنعت او سوداګرۍ وزارت معين احمدالله ذاهد پر مشرۍ پلاوی به ازبېکستان کې د يوه نندارتون په پرانېسته کې هم ګډون وکړي.
د صنعت او سوداګرۍ وزارت ویاند اخندزاده عبدالسلام جواد وايي: « د صنعت او سوداګرۍ وزارت معین مولوي احمدالله زاهد او ورسره مل پلاوي ازبېکستان هېواد ته خپل رسمي سفر پیل کړ. د دې سفر موخه د دواړو هېوادونو ترمنځ د سوداګرۍ د اړیکو لا پیاوړي کول او د اقتصادي همکارۍ پرمختګ دی. یاد پلاوی به د ازبېکستان د حکومت له لوړو پوړو چارواکو سره د اقتصادي او سوداګریزو فرصتونو، د سوداګرۍ د لا پراختیا او د ګډو پروژو پر عملي کولو بحثونه وکړي. د دې ترڅنګ به پلاوی په تاشکند کې د ازبېکستان حکومت له خوا جوړ شوي نندارتون په پرانیست غونډه کې هم ګډون وکړي.»
ټاکل شوې ياد پلاوی په ازبېکستان کې له مېشتو افغان سوداګرو سره هم وګوري او له کوربه هېواد به يې پر وړاندې د پرتو ستونزو د حل غوښتنه وکړي.
په ورته مهال، د اقتصادې چارو شنونکي وايي، له تاشکند سره د سیاسي اړیکو ترڅنګ اقتصادې اړیکې ټینګول مهم دي او ټینګار کوي چې اسلامې امارت دې له دې فرصت ګټه پورته کړي.
د اقتصادي چارو شنونکی نورالله عزیز وايي: « د دوی د استازو تګ راتګ یا د دوی په بازارونو کې افغاني توکو ته د خرڅلاو لپاره بازار موندل هغه څه دي چې افغان تجارانو ته د دې زمینه برابروي چې په خلاص لاس دغه هېواد ته صادرات وکړي او هم له دې هېواد توکي وارد کړي.»
ځینې نور بیا د ارزانې سوداګرۍ ترڅنګ د پانګونې جلب لپاره هم ازبېکستان ښه بديل ګڼي او ټينګار کوي چې تاشکند ته د سرپرست حکومت تللی پلاوی دې هڅه وکړي چې ازبېکستاني سوداګر په افغانستان کې پانګونې ته وهڅوي.
د اقتصادي چارو شنونکی محمدیونس ځدراڼ وايي: « افغان پلاوی باید ازبېکستان ته په دې سفر کې د ازبېکستان تجاران دې ته وهڅوي چې په افغانستان کې پانګونه وکړي، له افغانستان سره خپل تجارتي تعاملات زیات کړي، د ازبېکستان له هېواد سره قراردادونه وکړي او دې ته یې وهڅوي چې راشي او په افغانستان کې پانګونه وکړي. له دې سره به افغان وګړو ته د کار زمینه هم برابره شي.»
له دې وړاندې هم د سوداګرۍ د پراختيا لپاره د قزاقستان يو پلاوی کابل ته راغلی و.
قزاقستاني پلاوي حکومتي چارواکو سره پر ليدنو سربېره، په کابل کې ګډ نندارتون هم پرانيست. د افغانستان او قزاقستان چارواکو د تفاهم له لارې د سوداګرۍ زياتوالی د دواړو هېوادونو پر ګټه وباله او د متقابل ډاډ له مخې يې د سوداګرۍ د لا اسانولو ژمنې وکړې.ش
