رویټرز خبري اژانس د خپلو سرچينو له قوله راپور ورکړی چې د ډونالډ ټرمپ پر مشرۍ د امريکا حکومت غواړي د افغانستان په شمول له يو شمېر هېوادونو سره د خوړو په برخه کې ټولې مرستې پای ته ورسوي.
د راپور له مخې، امريکا په يادو هېوادونو کې دغه مرستې د ملګرو ملتونو د خوړو نړيوال پروګرام په شمول د ياد سازمان د وګړو صندوق او ځينو نورو سازمانونو له لارې ترسره کوي.
د دغو مرستو د بندېدو په صورت کې د هغو ادارو د فعالیت ځنډېدو اندېښنې هم را پورته شوې چې دغه مرستې تر اړمنو خلکو رسوي.
د خوړو نړيوال پروګرام (ډبلیو.اېف.پي) د ډونالډ ټرمپ دا احتمالي پرېکړه په افغانستان او ځينو نورو هېوادونو کې د عامو خلکو پر زيان بللې او زياته کړې يې ده چې له امله به يې په يادو هېوادونو کې نور خلک هم له لوږې سره مخ شي.
یاد پروګرام په دې اړه ویلي: « که دا پرېکړه عملي شي، دا به د هغو میلیونونو کسانو لپاره د مرګ سزا وي چې له شدیدې لوږې سره مخ دي. موږ له امریکا سره تماس نیولی، ترڅو د دې پرېکړې وضاحت وغواړو او هغوی وهڅوو چې د دغو ژوند ژغورونکو پروګرامونو ملاتړ ته دوام ورکړو.»
رویټرز خبري اژانس په خپل راپور کې زیاته کړې، د امريکا ۱.۳ میليارد ډالرو له بوديجې چې اړمنو هېوادونو ته د بشري مرستو لپاره ځانګړې شوې، ۵۶۲ ميليونه ډالر یې افغانستان ته ورکول کېدل. رویټرز وړاندې لیکلي، د مرستو دا احتمالي بندول د هغه پلان یوه برخه ده چې روانه اوونۍ د امریکا بهرنیو چارو وزارت او د دې هېواد نړیوالې پراختیايي ادارې(یو.اېس.اې.آی.ډي) له خوا عملي شو او پر اساس يې له هېوادونو سره مرستې کمې شوې.
په ورته مهال، د اقتصادي چارو شنونکي په اوس وخت کې نړیوالو بشري مرستو ته د افغانانو اړتیا جدي ګڼي او ټینګار کوي چې نړیواله ټولنه او په ځانګړې توګه امریکا دې د افغانانو لاسنیوي ته دوام ورکړي.
د اقتصادې چارو شنونکی نورالله عزیز وايي: « دا مهال باید حاکم نظام په هغو ټولو اړیکو تمرکز وکړي چې له امله یې نړیوالې مرستې زیاتېدلی شي یا هم نړیوالې مرستې د افغانستان اقتصاد ته جذبېدلی شي. د دې ترڅنګ باید خلکو ته د کار زمینه برابره شي، هغه څه چې یوه ستونزمنه موضوع ده. حاکم نظام باید په دې وخت کې بهرني پانګوال که افغانان وي یا بهرنیان، د افغانستان په داخل کې په مختلفو سکټورونو کې پانګونې ته وهڅوي.»
د اقتصاد وزارت چارواکي د لا ډېرو مرستو د جذب خبره کوي او وايي، سرپرست حکومت هڅه کوي نړیوالې مرستې را جذب کړي، خو په خبره يې نړیوال دې هم له افغانانو سره کېدونکي بشري مرستې له سیاست سره نه تړي.
د اقتصاد وزارت مسلکي معین عبدالطیف نظري وايي: « باثباته اقتصادي وده له داخلي توان د ګټې اخستنې او پانګونې د جذب په لاس کې دی؛ له همدې امله موږ هڅه کوو چې د پانګونې په جذبولو او دغه راز د خصوصي سکټور په پیاوړي کولو او د ملي ظرفیتونو په کارولو سره، پر ستونزو غلبه وکړو. البته موږ له ټولو هېوادونو او نړیوالې ټولنې هم غوښتنه کوو چې بشري مرستې همداسې بشري پاتې او د افغانستان له خلکو سره ادامه ولري.»
د دوشنبې په ورځ په افغانستان کې د ملګرو ملتونو سیاسي استازولۍ (یوناما) هم له نړیوالې ټولنې وغوښتل چې له افغانانو سره خپلې بشري مرستې جاري وساتي.
د ملګرو ملتونو د تازه راپور له مخې، په افغانستان کې نږدې ۲۳ میلیونه کسان بشري مرستو ته اړتیا لري.
