له سلما بند وروسته، هرات ولایت کې پاشدان دویم ستر بند دی، دغه بند د ښار شمال ختیځ لور ته په ۲۵ کیلومترۍ کې پروت دی.
که څه هم په هېواد کې له سیاسي تحول وروسته د دې بند د جوړولو چارې د څه وخت لپاره وځنډېدې، خو اوس چارواکي وايي رغنیزي چارې یې تر ۹۵ سلنو بشپړې شوې دي.
دوی زیاتوي، د هرات کرخ ولسوالۍ کې پروت پاشدان بند د ۲ مېګاواټه برېښنا د تولید او ۱۸ زره هکټاره ځمکې د خړوبولو ظرفیت لري او ټاکل شوې پاتي چارې یې تر راتلونکو دوو میاشتو بشپړې او ګټه اخیستنې ته وسپارل شي.
د پاشدان بند پروژې ساحوي انجینیر بهارالله همدرد وايي: « په ټوله کې د بند جوړولو کارونه له ۹۲ تر ۹۵ سلنو پورې مخته تللي او امیدوار یو چې زموږ پاتې کارونه په راتلونکو دوو میاشتو کې بشپړ شي.»
په یاد بند کې شاوخوا۵۰۰ کسانو لپاره د کار زمینه برابره شوې.
دلته په کار بوخت کسان وایي، خوښ دي چې په کور دننه ورته د کار زمینه برابره شوې او غوښتنه کوي چې سرپرست حکومت دې د دا ډول پروژو له پلي کولو سره نورو ځوانانو ته هم د کار زمینه برابره کړي.
د هرات اوسېدونکی فرامرز وايي: « موږ له اسلامي امارت ډېر خوشاله یو چې دا ډول پروژې په بشپړ امنیت کې دي، موږ او نور ځوانان دلته کار کوو. ښه ده چې زموږ ځوانان دلته کار وکړي، بهرنیو هېوادونو ته له تګ را ورګرځي او خپل هېواد آباد کړي.»
د هرات یو بل اوسېدونکی او د پاشدان بند کارګر وايي: « له ۱۰ تر ۱۱ کالو کېږي چې دلته کار کوم. زه ډېر خوښ یم چې په دې ملي پروژه کې کار کوم. کله چې دغه پروژه بشپړه شي، د افغانستان اقتصادي ودې ته به ډېره ګټه ورسوي.»
همدارنګه، د هرات سیمه يیز چارواکي هم ډاډ ورکوي چې د آبادۍ او خلکو ته د کاري فرصتونو رامنځته کولو په موخه هڅه کوي چې ورته نورې لویې پروژې هم تطبيق کړي.
د دوی په خبره، نږدې راتلونکي کې به په شین ډنډ کې د کادانک بند جوړولو چارې هم پیل شي.
د هرات والي ویاند محمد یوسف سعیدي په دې اړه وايي: « د هرات محلي اداره هڅه کوي چې د سترو زیربنايي پروژو په پلي کولو سره، د دې ولایت خلکو ته د کار زمینه برابره کړي. د دغو هڅو یوه بېلګه د پاشدان ستر بند پروژه ده. ټاکل شوې د شین ډنډ ولسوالۍ د کادانک بند کارونه هم په نږدې راتلونکي کې پيل شي او په دې سره نورو خلکو ته هم د کار زمینه برابره شي.»
پاشدان بند د ۵۴ میلیونو متر مکعب اوبو زېرمه کولو ظرفیت لري او اوس مهال له۱۰ تر ۱۲ مترو په لوړوالي سره په کې اوبه راټولې شوې دي.
