عامې روغتیا وزارت د ۴۲۴ اعلان شویو خالي بستونو لپاره له څه باندې درې نیم زره واجد شرایط غوښتونکو په آنلاین بڼه مرکز او ولایتونو کې د شمولیت ازموینې اخیستل پيل کړل.
دغه ازموینه چې ۱۵ ورځې به دوام کوي، د مرکزي روغتونونو لپاره د قابلګۍ، نرسنګ او نورو اړوند ۱۵ څانګو کې د څلورم، پنځم او شپږم بستونو لپاره د آزادې سیالۍ لاره اخیستل کېږي.
د عامې روغتیا وزارت سرپرست مولوي نور جلال جلالي د ازموینې د پيل مراسمو کې د خبرو پرمهال د ازموینې ګډونوالو ته د پوره روڼتیا او شفافیت ډاډ ورکړ.
جلالي په دې اړه وايي: « په دې وجه باندې دغه شاوخوا ۴۴۵ مسلکي بستونه چې له موږ سره موجود وو، اعلان ته وسپارل شول او د اداري اصلاحاتو ادارې له لارې یې نن د ازموینې ورځ ده.»
د عامې روغتیا وزارت د سرپرست په خبره، د اسلامي امارت د مشرتابه له لارښوونې سره سم، کار اهل کار ته د سپارلو په موخه د دې وزرات ټولو مسلکي او تخصصي بستونه ته په شفافه بڼه ازموینې اخیستل کېږي.
نورجلال جلالي زیاتوي، د اسلامي امارت رهبر ته د هرې ولسوالۍ په کچه د یوه روغتون د جوړولو له وړاندیز وروسته یې په ۳۱۸ ولسوالیو کې د روغتونونو د جوړولو منظوري هم ترلاسه کړې.
د عامې روغتیا وزارت سرپرست په دې اړه وویل: « په ۳۱۸ ولسوالیو کې موږ د ولسوالیو د سطحې شفاخانې جوړې کړو، هغه ډیزاین شوې او د تدارکاتو له خوا یې په ډېره چټکۍ سره کار روان دی. په دې شفاخانو کې به چې تقریبا ًهره یوه یې ۳۰ بستریزه ده، زموږ د ملت بچیان تداوي کېږې او د همدې ملت مسلکي پرسونل به ورته خدمات وړاندې کوي.»
ورته مهال، د اداري اصلاحاتو او ملکي خدمتونو ادارې چارواکي برېښنايي ازموینې د درغلۍ د مخنیوي او د شفافیت رامنځته کېدو په موخه اغېزناک ګام بولي.
د اداري اصلاحاتو او ملکي خدمتونو ادارې رییس شهزاد نور راشد وايي: « هغه ملګري چې دلته راځي او امتحان ورکوي، هغو ته پوره ډاډ ورکوو چې دلته به له تاسو سره درغلي نه کېږي. په دې کمپیوټرونو کې په کامله معنا شفافیت پروت دی.»
بل پلو، د چارو ادارې مسوولین بیا په تېرو درېیو کلونو کې د ازموینو د اخیستلو او د ظرفیت لوړونې په برخو کې د سلګونه پېچلو پروسو د اسانه کولو خبر ورکوي.
د چارو ادارې مرستیال سیفالدین تائب وايي: « له دوی زموږ غوښتنه دا ده، که خدای نا خواسته استعداد یې کم دی او پوښتنو ته سم ځواب نه شي ورکولی، له ځان سره دې فکر وکړي او تبلیغات دې نه کوي او راتلونکو پروسو ته دې چمتوالی ونیسي.»
همدارنګه، د ازموینې یو شمېر ګډونوال د دغه بهیر له روڼتیا خوښي ښيي او له سرپرست حکومته ځوانانو ته د کاري زمینو د برابرولو غوښتنه کوي.
د ازموینې ګډونوال اغامیر سمېع وايي: « د اداري اصلاحاتو له ادارې زموږ غوښتنه دا ده، لکه څرنګه چې نن ورځ ازموینه واخیستل شوه، په همدې روڼتیا او شفافه بڼه دې نورې ازموینې هم واخیستل شي؛ ترڅو یو زحمت کش ځوان له خپل حق محروم نه شي.»
د ازموینې یو بل ګډونوال محب الله شاهین وايي: « موږ ازموینې ته چمتوالی نیولی او پوره آماده یم چې ازموینه ورکړم او راتلونکي کې د خپلو خلکو او هېواد خدمت وکړم.»
روغتیا وزارت داسې مهال خپلو خالي بستونو لپاره د کار قوه جذبوي چې د ملګرو ملتونو د روغتیا نړیوال سازمان د شمېرو له مخې، افغانستان دا مهال د ډاکټرانو او صحي کارکوونکو له شدید کمښت سره مخ دی.
دې سازمان تېره میاشت په یوه راپورکې وویل، په داسې حال کې چې په نړیواله کچه د هرو زرو کسانو لپاره نږدې درې تنو ډاکټرانو ته اړتیا ده؛ خو په وینا یې دغه شمېره په افغانستان کې یوازې یو تن دی.
