د ملګرو ملتونو امنيت شورا يو ځل بيا بهر ته د اسلامي امارت د مهمو چارواکو پر سفر بنديز تمدید کړ.
د دې بنديز له مخې، د سرپرست حکومت جګ پوړي چارواکي نه شي کولی بهرني سفرونه ولري.
د ملګرو ملتونو امنيت شورا غړیو هېوادونو د جمعې پر شپه دغه پرېکړه ليک د رايو په غوڅ اکثريت تایيد کړه او د تېر په څېر يې یوځل بيا د سرپرست حکومت مهم چارواکي د ۱۴ میاشتو لپاره بهر ته له سفر کولو بند کړل.
د امنیت شورا خبرپاڼې یوه برخه: « د امنیت شورا ۱۵ دایمي غړیو په حضور کې د ۲۰۲۴ زېږدیز کال د ۲۷۶۳ تصویب شوي پرېکړه لیک ته رایه وکاروله او دغه سند یې تر ۱۴ نورو میاشتو پورې تمدید کړ.»
دغه بنديز واک ته د اسلامي امارت له بیا ځل رسېدو سره سم لګول شوی او له هغه وروسته دوه ځله تمدید شوی دی.
د اسلامي امارت چارواکي د امنیت شورا دغې پرېکړې ته په غبرګون کې وایي، پر حکومت د فشار سیاست پایله نه لري او په خبره یې د ستونزو حل لپاره باید د بندیزونو پر ځای له سرپرست حکومت سره مثبت تعامل وشي.
په قطر کې د اسلامي امارت د سیاسي دفتر رییس سهیل شاهین وايي: « د ملګرو ملتونو امنیت شورا باید په دې غور وکړي چې هرکله ملګرو ملتونو او نړیوالو د افغانستان په هکله د انزوا له سیاست او فشار کار اخیستی، نتیجه یې نه ده ورکړې. نو، ولې د دې ناکامې تګلارې پر ځای د مثبت تعامل لاره نه خپلوي؛ ترڅو مسایلو ته د افغانستان د اوسنیو واقعیتونو په رڼا کې یو معقول حل پيدا او د فشار دې لړۍ ته د پای ټکی کېښودل شي.»
ورته مهال، د اقتصاد وزارت چارواکي وايي، د ملګرو ملتونو امنیت شورا له لوري لګول شوي بندیزونه د افغانانو پر ژوند منفي اغېز کوي.
د اقتصاد وزارت مسلکي معین عبداللطیف نظري وايي: « پر اسلامي امارت د هر ډول تحریم او فشار لګول، د افغانستان پر خلکو د فشار راوړلو مانا لري. موږ له نړیوالې ټولنې غوښتنه کوو چې له اسلامي امارت سره د تعامل او خبرو لاره غوره کړي.»
د امنیت شورا دغه پرېکړه ليک ته د چين او روسيې استازو هم مثبته رایه ورکړې، هغوی چې له دې وړاندې یې په امنیت شورا کې د سرپرست حکومت ننګه کوله.
امنیت شورا کې د چين استازي په افغانستان کې امنيتي وضعيت ته په کتو ويلي، د افغانستان کنګل شوې شتمني دې هم آزاده شي.
پوښتنه دا ده چې د اسلامي امارت د سرپرست حکومت پر جګ پوړو چارواکو د بندیزونو ادامه او فشار به څه پایلې ولري؟
د نړیوالو اړیکو کارپوه نجیبالرحمن شمال وايي: « هیله ده سرپرست حکومت د دغو ستونزو د رفع کولو لپاره په خپلو پالیسیو او د حکومت په جوړښت کې بدلون راولي او د نړیوالې ټولنې هغه غوښتنې ومني چې د افغانستان د خلکو ملي ګټې په کې نغښتې وي، ترڅو دغه بندیزونه هم لرې شي.»
د سیاسي چارو شنوونکی محمد سلیم پیګیر وايي: « اوس د تعامل وخت دی نه د فشار راوړلو. حل لاره له اسلامي امارت سره تعامل دی نه نړیوال فشارونه.»
پر افغانستان د اسلامي امارت له واکمنېدو څه باندې درېیو کلون تېرېدو سره، نه یوازې دا چې د اسلامي امارت د چارواکو نومونه د ملګرو ملتونو له تور لېست نه دي ایستل شوي، بلکې نور هم زيات شوي.
