کابل له مودې وروسته يو وار بیا د چهارشنبې پر ورځ د (۱۴۰۳ کال د لیندۍ پر ۲۱ مه) د چاودنې شاهد و، خو دا ځل په کې د کډوالو او بېرته راستنېدونکو چارو وزارت سرپرست خلیل الرحمن حقاني په وزارت کې دننه د خپل دفتر تر مخې هدف ګرځول شوی.
مسوولین وايي، پر نوموړي د وزارت په انګړ کې هغه مهال چاودنه وشوه، چې د ماسپښين لمانځه د ادا کولو لپاره له دفتر انګړ ته وتلی و.
اسلامي امارت پر نوموړي شوی بريد د داعش کار بللی او ويلي يې دي، چې په دې ډول بريدونو سره ورته ډلې خپلو موخو ته نه شي رسېدلی.
د خبرپاڼې یوه برخه:« اسلامي امارت د حقاني صاحب مرحوم شهادت د اسلامي امارت، مجاهدینو، کورنۍ او ټولو افغانانو لپاره یو ستره ضایعه بولي، نوموړي ته فردوس جنت، کورنۍ دوستانو او متعلقینو ته د جمیل صبر او جزیل اجر دعا کوي، خو متأسفانه نن د هغو خوارجو لخوا په شهادت ورسید چې ځانونه مسلمان بولي او سوا له ځان نور مسلمانان تکفیروي، بلکې داسې بزدلانه عمل د اسلام او دین د دوښمنانو مخ توروي او د هغوی د شومو ارادو څرګندونه کوي.»
د حقاني شهادت په کور دننه او بهر له ځانه سره غبرګونونه لري.
د هېواد پخواني ولسمشر حامد کرزي پر خلیل الرحمن حقاني شوی برید په کلکو ټکو غندلی او د نوموړي له کورنۍ سره يې خواخوږي شریکه کړې.
هغه زیاته کړې:« په ډېرې خواشینۍ مې خبر ترلاسه کړ، چې د مهاجرینو او راستنېدونکو وزارت په انګړ کې د یوې چاودنې له امله د دغه وزارت سرپرست الحاج خلیل الرحمن حقاني او زموږ یو شمېر نور هېوادوال شهیدان شوې. خلیل الرحمن حقاني د افغانستان د یوې درندې جهادي کورنۍ غړی و، چې د پخواني شوروی اتحاد د یرغل خلاف جهاد کې یې مهم نقش درلود.»
د پاکستان بهرنیو چارو وزير اسحاق ډار هم د خلیل الرحمن حقاني پر ترور خواشیني ښودلې او دا یې تروریستي برید بللی.
هغه زیاته کړې:« موږ د افغانستان د کډوالو چارو وزارت د سرپرست خلیل الرحمن حقاني پر مړینه او نن په کابل کې د افغانستان د کډوالو چارو په وزارت کې د یوه تروریستي برید په پایله کې د ځاني زیانونو له امله خواشیني یوو. موږ د زړه له کومې تسلیت وړاندې کوو. پاکستان په ښکاره ډول ترهګري په هر ډول او ښکاره ډول غندي.»
د کډوالو او بېرته راستنېدونکو چارو وزارت پر سرپرست خلیل الرحمن حقاني د برید مسوولیت داعش ډلې پر غاړه اخیستی دی.
داعش ډلې ته منسوب “اعماق” اژانس راپور ورکړی چې دغه برید کې یې له سرپرست وزیر سربېره د هغه همکاران هم پر نښه کړي دي.
۵۸ کلن خلیل الرحمن حقاني د پخواني جهادي قوماندان جلال الدین حقاني ورور او د کورنیو چارو وزارت سرپرست خلیفه سراج الدین حقاني تره وو.
خلیل الرحمان حقاني په ۱۹۶۶ کال د پکتیا په ګردې څېړۍ ولسوالۍ کې زږېدلی و او واک ته د سرپرست حکومت له رسېدو سره سم لاسي د کډوالو او بېرته راستنېدونکو چارو وزارت سرپرست وټاکل شو.
