په کابل کې د عامي روغتیا وزارت، جایکا موسسې او روغتیا نړیوال سازمان ترمنځ په ګډې همکارۍ د انتاني ملي تخصصي روغتون د تشخیصیه مرکز لپاره د ودانۍ او دغه راز په افغان جاپان روغتون کې د يوې ورته بل مرکز لپاره د ودانۍ جوړولو عملي چارې پيل شوې.
د عامي روغتیا وزارت چاواکي وايي، دا پروژې د جایکا موسسې او روغتیا نړیوال سازمان په ملاتړ د ۱۰۰ میلیونه افغانیو په ارزښت پلې کېږي او چارې به يې په درېيو میاشتو کې بشپړې شي.
دوی د پروژو اساسي موخه خلکو ته په انتاني او افغان جاپان روغتونونو کې د اړینو اسانتیاوو برابرول يادوي.
د عامي روغتیا وزارت ویاند شرافت زمان وايي: « نن چې د کومو دوو پروژو افتتاح وشوه، یوه یې د کابل په افغان جاپان روغتون کې او بله یې د کابل په انتاني روغتون کې ده. دغه دوه څانګې تشخیصیه څانګې دي چې په کې به دوه سي ټي سکن ماشینونه لګول کېږي او ترڅنګ به یې ډاپلر او الټراسونډ خدمتونه وړاندې شي. همدارنګه یو شمېر هغه تشخیصیه وسایل به هم چمتو شي چې په دې روغتونونو کې ورته اړتیا ده.»
د انتاني ملي تخصصي روغتون رییس د يادو پروژو له امله خوښ دی، خو په دې روغتونو کې د ځينو موجوده ستونزو يادونه هم کوي.
د انتاني ملي تخصصي روغتون رییس سپین ګل سبحاني ځدراڼ وايي: « زموږ یو اساسي مشکل د سټنډرډ جدي مراقبت (آی.سي.یو) نه لرل دی، د درملو او طبي تجهیزاتو لپاره د معیاري سټاک نه لرل مو بله ستونزه ده. د درملو د لابراتوار، لېجنټ او طبي تجهیزاتو کمښت هم زموږ ستونزې دي.»
د عامي روغتیا وزارت د معالجوي طب رییس وحدت الکوزی وايي: « اوسمهال په درېیو روغتونونو کې سي ټي سکنونه لرو، له دې سره به دوه نور هم زیات شي او ټول به پنځه سي ټي سکنونه شي.»
که څه هم په لرې پرتو سيمو او ان د ځينو ولایتونو په مرکزونو کې خلک روغتيايي خدمتونو ته د محدود لاسرسي له امله شکايت کوي، خو د عامې روغتيا وزارت خبر ورکوي چې د يادې ستونزې د هواري لپاره د اسلامي امارت رهبر د حکم پر بنسټ په ۳۱۸ ولسواليو کې معياري روغتونونه جوړېږي.
د عامې روغتیا وزارت سرپرست نور جلال جلالي وايي: « امیرالمؤمنین د خپل خاص شفقت او مهربانۍ له مخې د کال په منځ کې موږ ته د دغو روغتونونو لپاره چې ۳۱۸ ولسوالیو کې به جوړېږي، بودیجه منظوره کړه.»
د روغتیايي چارواکو د معلوماتو له مخې، په ۱۴۰۱ لمریز کال د کابل انتاني روغتون کې د روغتیا نړیوال سازمان په همکارۍ ۲۰ نور بسترونه هم زیات شوي او په همدې موده کې د دغه روغتون عاجله څانګه او لابراتوار د ۴۰۰ زره امریکايي ډالرو په لګښت، د روغتیا نړیوال سازمان په همکارۍ ګټې اخیستنې ته سپارل شوي دي.
