هر کال د ژمي په را رسېدو سره په کابل او ولايتونو کې د برېښنا پرچاوي زياتېږي او په يوه شپه ورځ کې پر خورا کمې برېښنا بسنه کوي.
خو سږکال له يوې خوا د بې روزګارۍ او ټيټ اقتصاد او له بلې خوا د سون توکو لوړو بيو له امله، د خلکو د ستونزو کچه څو برابره لوړه شوې.
د کابل اوسېدونکي وايي، په داسې حال کې چې ژمي ته لا هم يوه مياشت پاتې ده، خو د يخنۍ له زياتېدو سره سم، د برېښنا پرچاوي زیاته شوې.
دوی زیاتوي چې په يوه شپه ورځ کې يوازې ۵ او يا هم ۶ ساعته برېښنا لري او دغه اندازه ورته بسنه نه وي.
دوی د برېښنا پرچاوۍ ترڅنګ د سون توکو د بیو لوړوالی، بېروزګاري او کمزوی اقتصاد د خپلو ستونزو اصلي لاملونه بولي او په خبره يې، نه شي کولی د يادو ستونزو له امله په ژمي کې خپل کورونه تاوده وساتي.
د کابل ښار یو تن اوسېدونکی وايي: «برېښنا راشي دوه یا دری ساعته وي او بېرته لاړه شي. موږ له طالبانو غواړو چې برېښنا راجوړه کړي ځکه چې د اوبو او ګرمولو لپاره ورته اړتیا لرو.»
د ښار یوه اوسېدونکې هم د برېښنا له ډېرې پرچاوۍ شکایت کوي: «خلک د دې وس نه لري چې لرګي یا سکاره واخلي، یوازې برېښنا ده چې کولی شي خپلې بخارۍ روښانه کړي. ځینې کسان د برېښنايي بخاریو په وسیله صندلۍ جوړوي، نو د همدې لپاره دایمي برېښنا ته اړتیا ده.»
له دې سره صنعتکاران هم د برېښنا پرچاوۍ له امله شکايت کوي. د صنعتکارانو ټولنې مشر عبدالجباری ساپی وايي، د برېښنا پرچاوۍ زياتوالي د توکو د تولید کچه اغېزمنه کړې.
هغه په دې اړه وايي،: « د افغانستان د صنعت لپاره برېښنا ډېره مهمه ده او د ملا تیر رول لوبوي. دا مهال په کابل او ولایتونو کې موږ د شپې او نیمه ورځ برېښنا لرو. زما غوښتنه دا ده چې که موږ ټوله ورځ برېښنا ولرو، کارونه به ډېر ښه شي. له چارواکو غوښتنه کوم چې د برېښنا لپاره منظم پلان جوړ کړي ترڅو صنعتکاران متضرر نه شي.»
په همدې حال کې مسوولین وايي، په منظمه توګه د برېښنا د وېش او دغه راز له کورنيو سرچينو د برېښنا د تولید کچې د زياتوالي پر پلان کار روان دی.
د افغانستان برېښنا شرکت ویاند حکمتالله ميوندي وايي: « د دې ترڅنګ چې د افغانستان برېښنا شرکت د منظمې برېښنا رسولو لپاره هڅې کوي، پر دې هم کار روان دی چې د برېښنا داخلي تولید کچه لوړه کړو. په دې وروستیو کې له درې ګونو کارخونو د اعظمي ګټې اخیستنې لپاره په دې بریالي شوي یو چې د داخلي تولید کچه یوه اندازه لوړه کړو ترڅو هېوادوالو ته زیاته اندازه برېښنا ورسېږي.»
د اوبو او نرژۍ وزارت وياند مطيعالله عابد وايي: « په ټوله کې اته بندونه تر کار لاندې دي چې د اوبو د مدیریت ترڅنګ به برېښنا هم تولید کړي. د لمریزې برېښنا په برخه کې د کابل ولایت په سروبي ولسوالۍ کې د ۱۰ مېګاواټه برېښنا پروژه بشپړه او ګټې اخیستنې ته وسپارل شوه. افغانستان کې د لمریزې برېښنا ظرفیت دا مهال ۵۵ مېګاواټو ته رسېږي.»
د برېښنا کموالی د کابل اوسېدونکو پر تلپاتې ستونزه بدل شوی. که څه هم چارواکو له بهر په زياته پيمانه د برېښنا د واردولو ژمنه کړې، خو خلک وايي دا ژمنه تر اوسه هم نه ده پوره شوې.
دوی له سرپرست حکومت غواړي چې د برېښنا د پرچاوۍ ستونزه په اساسي توګه حل کړي او د بندونو په جوړولو، له کورنيو سرچينو د برېښنا توليد لپاره د پانګونې جلب ته جدي پاملرنه وکړي.
