روسیه او اوکراین د جګړې له پیل وروسته داسې پړاو ته رسېدلي چې دا مهال د یو بل پر وړاندې د خپل وروستي زور ازموینه کوي.
په همدې لړ کې، د تېرو درېیو ورځو پرمهال دغو دوو ګاونډیو هېوادونو پر یو بل د ریکارډ تر کچې توغندیز او ډرون بریدونه کړي چې ډېری هغه یې پر اهدافو لګېدلي دي.
د روسيې پوځ د اوکراین له لوري د تېرې ورځې بریدونه تایید کړي او ویلي يې دي چې په دې بریدونو کې له ځان چاودونکو ډرون الوتکو کار اخیستل شوی، خو ګڼ شمېر یې هدف ته له رسېدو وړاندې له منځه وړل شوي دي.
د روسیې دفاع وزارت د اعلامیې یوه برخه:« د روسيې پر خاوره د کیف برید چې په کې له ډورن الوتکو کار اخیستل شوی، ډېری یې شنډ شوي دي.»
دغه بریدونه پر اوکراین د روسیې له خوا له ورته بریدونو یوه ورځ وروسته ترسره شوي
روسي چارواکي وايي، د اوکراین په بریدونو کې د پلازمېنې مسکو ګڼې برخې او درې نړیوال هوايي ډګرونه هم په نښه شوي چې د لنډې مودې لپاره یې ځینې الوتنې هم له ځنډ سره مخ کړې دي.
روسیې له دې بریدونو یوه ورځ وړاندې پر اوکراین ۱۴۵ ډرونونه وتوغول چې ګڼ هغه یې پر نښه شویو موخو باندې لګېدلي دي.
شنونکي له ډرون الوتکو کار اخیستل د روسیې پر وړاندې د اوکراین د پوځي ځواک انډول او د دې هېواد د بریدونو کنټرولولو لپاره یوازینۍ لاره بولي او وايي، په دغو بریدونو کې تر ډېره د روسیې د پوځي تجهیزاتو زېرمې، نفتي تأسیسات او د رادار سیسټمونه پر نښه کېږي.
د اوکراین ولسمشر ولومیرزیلېنسکي وايي: « روانه اوونۍ زموږ هوايي ځواک شپه او ورځ کار کړی چې د اوکراین آسمان د روسیې له یرغله خوندي وساتي. تېره شپه روسیې د ریکارډ ترکچې ۱۴۵ ډرون بریدونه ترسره کړل.»
بل پلو، رویټرز خبري آژانس د ځینو سرچینو په حواله راپور ورکړی چې د امریکا نولي ټاکل شوي ولسمشر ډونالډ ټرمپ په ټاکنو کې له بریا وروسته، د روسیې له ولسمشر ولاديمیرپوتین سره په لومړي ځل ټیلیفوني خبرې کړې او له هغه یې د اوکراین جګړې د ختمولو غوښتنه کړې.
دا په داسې حال کې ده چې د جوبایډن پر مشرۍ د امریکا حکومت کاري مودې پای ته رسېدو لپاره شاوخوا اویا ورځې پاتې دي.
دې هېواد د ملي امنیت شورا سلاکار جک سلیوان رسنیو ته ویلي، ښايي ولسمشر بایډن په دې موده کې په لیکلي بڼه له کانګرېس غوښتنه وکړي چې ټرمپ د اوکراین جګړې ملاتړ کولو ته وهڅوي.
هغه زیاته کړې: « بایډن به په راتلونکو ۷۰ ورځو کې دا فرصت ولري چې د یوې قضیې په استولو سره له کانګرېس غوښتنه وکړي چې د ټرمپ پر مشرۍ د امریکا راتلونکې ادارې ته اجازه ورنه کړي چې اوکراین ته شا واړوي. اوکراین ته شا کول به په اروپا کې لا زیاتې بې ثباتۍ ته لار هواره کړي.»
د اوکراین له جګړې ملاتړ ته د ټرمپ هڅولو خبرې داسې مهال کېږي چې نومړي په خپلو ټاکنیزو غونډو کې د اوکراین او غزې تړانګې د روانو جګړو درولو ټټر وهلی او ژمنه یې کړې چې د بریا په صورت کې به دغه جګړې یوازې په یوې اړیکې ودروي.
بل پلو، د لوېدیځو رسنیو نا تایید شوي راپورونه وايي، د جګړې له پیل تر دې دمه د روسیې څه باندې ۷۰۰ زره سرتېري وژل شوي او لسګونه زره پوځي تجهیزات یې له منځه تللي.
دا په داسې حال کې ده چې د اوکراین استخباراتو تېره اوونۍ په لومړي ځل د شمالي کوریا له پوځ سره د اوکرایني پوځ د مخامخ ښکېلېدو راپور ورکړ او وویل، دې هېواد د روسیې په ملاتړ شاوخوا ۱۲زره سترتېري، ۵۰۰ پوځي قوماندانان او درې جنرالان د جګړې لومړۍ کرښې ته استولي دي.
